İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 81 Hüküm no: 47 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sebzeci esnafının, kethüdaları Bostânî Mehmed’den şikayetçi oldukları Ma‘rûz Sâdır olan fermân-ı âlîlerine imtisâlen Âsitâne-i aliyye’de sebzeci esnâfından ashâb-ı arzuhâl Selim Beşe ve Molla İsmail ve Süleyman ve Ali Usta ve zimmî ustalarından Duka ve Çelo ve Tano ve Kosta ve İstefan ve Piço ve Yorgi ve diğer İstefan ve Piço ve Dilo ve diğer Kosta ve Prako ve Yorgi ve Hano ve Kostanti ve Viko ve Metro ve âhar Kosta ve Kostanti ve Taşo ve Vasil ve Anaştaş ve Zoti ve Simo ve Hristo ve Keresto ve Dimo ve diğer Hristo ve İstefan ve Yorgi ve Zoti vesâ’ir mazbûtü’l-esâmî ustalar meclis-i şer‘-i münîrde arzuhâlde mezkûrü’l-ism hâlâ esnâf-ı mezbûre kethüdâsı Mehmed Ağa tarafından esnâf-ı mezbûre beyinlerinde iktizâ eden kethüdâlığı umûrunu rü’yete bâ-hüccet-i şer‘iyye vekîli Bostânî Mehmed nâm kimesne muvâcehesinde her biri takrîr-i kelâm edip işbu yedimizde olup bin yüz doksan sekiz senesi Şevvâli’nin on dokuzuncu günü târihiyle müverrah ve ol târîhde İstanbul kadısı ve hâlâ şeyhülislâm-ı sellemehü’s-selâm Mehmed Mekkî Efendi Hazretleri’nin sicilden muhreç bir kıt‘a i‘lâmı mantûkınca öteden berû kethüdâmız olanlara rûz-ı Kasım’da bir def‘a elli guruş ve rûz-ı Hızır’da dahî kezâlik bir def‘a elli guruşu ve iktizâ ettikçe vukû‘ bulan beher loncamızda üçer guruş ve dükkân gediği bey‘ olundukça üçer guruş verilegelip bunlardan mâ‘adâ avâ’id nâmıyla ziyâde nesne mutâlebe olunduğu yoğiken vekîl-i merkūm Bostânî Mehmed tama‘-ı hâmından nâşî avâ’id-i mu‘tâde-i mezkûreye adem-i kanâ‘at ile ben üzerinize müceddeden kethüdâ vekîli oldum deyü her bir dükkândan birer altın ve dahî ziyâde akçe mutâlebe ve her birimizi tecrîm sevdâsıyla gûnâ gûn ifk ü iftirâ ile bizi tekdîr eylediğinden mâ‘adâ yedimize i‘tâ olunan işbu emr-i âlîşânda tasrîh olunduğu üzre İstanbul ve tevâbi‘inde sebzeci dükkânı yüz altmış dört aded dükkâna münhasıra olup ziyâde dükkân küşâdı ve dekâkîn-i mu‘addede-i mezkûrenin gayrı âhar dükkânlarda sebze bey‘i memnû‘ iken vekîl-i merkûm hilâf-ı emr-i âlî ve muğâyir-i şurût-ı kadîme dekâkîn-i mu‘addede-i mezkûreden hâric âhar dükkânlarda sebze ve et bey‘ine tezkireler verip ve esnâfımızın nizâmına dâ’ir senedâtımızı dahî bir takrîb yedimizden ahz ve bu vecihle nizâmımızın ihtilâline bâ‘is olmuşdur deyü iştikâ eylediklerinde vekîl-i mezbûr Bostânî Mehmed dahî bâlâda zikr olunduğu üzre esnâf-ı mezbûrûnun kadîmî viregeldiklerinden mâ‘adâ kethüdâlık-ı mezkûrun ziyâde îrâdını beyâna kādir olmayıp ve aklâmda dahî kaydı olmamağla fîmâ ba‘d esnâf-ı mezbûrenin senedâtını cümle esnâf ustaları ma‘rifetleriyle mahall-i me’mûnda bir sandık derûnuna vaz‘ ve iktizâ ettikçe yine ma‘rifetleriyle ihrâc ve ber-vech-i meşrûh beher rûz-ı Kasım’da ellişer guruş ve rûz-ı Hızır’da dahî kezâlik ellişer guruş ve loncaları ve kadîminde üçer ve dekâkîn gediği bey‘ olundukça kezâlik üçer guruşdan ziyâde akçe mutâlebe etmeyip ve nizâm ve emr-i âlîye muğâyir hareket etmemek üzre ba‘de’t-ta‘ahhüd sebzeci esnâfı mezbûrûn emr-i âlî-i mezkûrda tasrîh olunduğu üzre yüz altmış dört aded dekâkînden mâ‘adâ âhar mahalde sebzeci dükkânı küşâd olunmayıp ve ber-vech-i muharrer kadîmden beru verilügelen mebâliğ-i mezkûreden ziyâde kendilerden avâ’id-i kethüdâ’iyye mütâlebesiyle rencîde olunmamaları bâbında tuğrâ-yı garrâ ile mu‘anven emr-i âlîşân sudûru niyâzında oldukları huzûr-ı âlîlerine i‘lâm olundu. Fî 9 min Râ. sene 1202.