İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 85 Hüküm no: 53 Orijinal metin no: [12b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Yani’nin, Aleksandri Ananosti ile bakkal sehmi hissesinin satışı konusunda birbirleriyle anlaştıkları Ma‘rûz Sâdır olan fermân-ı âlîlerine imtisâlen bakkâl tâ’ifesinden arzuhâl eden Panayot v. Yani nâm zimmî Harameyn-i şerîfeyn müfettişi müderrisîn-i kirâm-ı zevi’l-ihtirâmdan es-Seyyid Abdülhalim Efendi ile bi’l-ma‘iyye akd olunan meclis-i kavîmde arzuhâlde mezkûrü’l-ism Aleksandri Ananosti v. Kostantin nâm zimmî muvâcehesinde takrîr-i kelâm edip Hüdâvendigâr-ı esbak merhûm Sultan Ahmed Hân Hazretleri’nin Enderûn-ı hümâyûnda vâki‘ kütübhâneleri vakfından İstanbul’da Fazlıpaşa Sarayı’nda kâ’in bir bâb bakkâl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme yüz yirmi sehm i‘tibârıyla altmış sehmi mersûm Aleksandri Ananosti zimmînin ve on beş sehmi dahî Preşkova Nasrâniye’nin olmak üzere yedimizde mülklerimiz olup mersûmenin on beş sehmini vekîl-i müsbet-i şer‘îsi zevci Hristo zimmî doksan üç senesinde yüz elli guruş semen-i makbûza bi’l-vekâle bana bey‘ etmekle âlât-ı mezkûrenin yetmiş beş sehmi benim mülküm olmuşiken mersûm Aleksandri Ananosti zimmî [12a] hisse-i mezkûreyi dahî zabtıma mumâna‘at eder deyü da‘vâ eylediğimde ol dahî cevâbında mersûme Preşkova Nasrâniye yüz bir senesinde hisse-i mezkûresini yüz elli guruşa bi’l-asâle bana bey‘ etmişdir deyü ber-vech-i muharrer mukaddemâ benim iştirâ eylediğimi inkâr ile beynimizde ba‘de’l-münâza‘a bâ-vesâtat-ı muslıhîn ben da‘vâ-yı mezkûremden zimmî mersûm ile üç yüz guruş bedel-i makbûza ba‘de’s-sulh ve’l-kabûl âlât-ı mezkûrenin nısfı benim ve nısf-ı âharı mersûm Aleksandri Ananosti zimmînin olmuşdur dedikde ol dahî tasdîk edip bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 19 Rebî‘ü’l-evvel sene 1202. Derkenar: Bakkâl sehmi sulh