İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 86 Hüküm no: 54 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryora bt. Vasil’in, Kahveci Avanes v. Parsek’e kendisine sövdüğü gerekçesiyle açtığı davadan feragat ettiği Ma‘rûz Sâdır olan fermân-ı âlîlerine imtisâlen arzuhâl eden Ayvansaray kurbünde Mustafapaşa mahallesi mütemekkinelerinden şahsı mu‘arrrefe Maryora bt. Vasil nâm Nasrâniye meclis-i şer‘-i kavîmde arzuhâlde mezkûrü’l-ism mahalle-i mezbûrede Lonca nâm mahalde Kahveci Avanes v. Parsek nâm zimmî muvâcehesinde takrîr-i kelâm edip ben kendi hâlimde ırzım ile mukayyede iken mersûm Avanes zimmî ırzıma ta‘arruz kasdıyla sûklarda söğe gelip ve târîh-i i‘lâmdan bir hafta mukaddem Cum‘a günü ba‘de’l-asr menzilim kapısını dimelenüp? bu vecihle bana ta‘arruz etmekle suâl olunup mûcib-i şer‘îsi icrâ olunmak murâdımdır deyü ba‘de’d-da‘vâ ve’l-istinkât mersûm Avanes zimmî dahî külliyen inkâr ile beyinlerinde ba‘de vukû’i’l-münâza‘a bâ-vesâtat-ı muslıhîn müdde‘iyye-i mersûme da‘vâ-yı mezkûresinden meccânen fâriğa olup husûs-ı mezkûra müte‘allika âmme-i da‘vâdan mersûm Avanes zimmînin zimmetini ba‘de’l-ibrâ ve’l-kabûl müdde‘iyye-i mersûme ve mesfûr Avanes zimmîden her biri kendi hâllerinde ehl-i ırz makûlesindendir deyü mahalle-i mezbûre imâmı Osman Efendi b. Abdullah ve müezzin Mehmed Efendi b. İsmail ile mahalle-i mezbûre mütemekkinlerinden Simaven v. Evadik ve Vartan v. Avanes ve Parsek v. Filoz ve Madyos v. Ohan ve Kigork v. Tekfur ve Kirkor v. Mığırdıç ve Nikegos v. Teros nâm zimmîler ihbâr ve fîmâ ba‘d yine kendi hâlinde ırzıyla mukayyed olup mezbûreye vesâ’ire ta‘addî ve ta‘arruz etmemek üzre mersûm Avanes zimmîye kefîller olup bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 18 min Ra. sene 1202. Derkenar: Livata da‘vâsından fâriğ