İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 87 Hüküm no: 55 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa b. Yusuf’un kasab kethüdası olarak tayin olduğu Ma‘rûz Sâdır olan fermân-ı âlîlerine imtisâlen işbu arzuhâl ve derkenârlara nazar olundukda İstanbul’da kasab esnâfının kethüdâlığı bundan akdem cânib-i mîrîye senevî üç bin akçe ile bâ-berât-ı âlîşân es-Seyyid Mustafa ve Hüseyin’in üzerlerinde iken kethüdâlık-ı mezkûr ve mîrîsi ref‘ ve mahalli terkîn olunup ba‘dehû İstanbul kadılarının hüccetleriyle kethüdâ nasb olunageldiği derkenârdan müstefâd oldukdan sonra esnâf-ı mezbûre ustalarından Serkiz v. Melkon ve Kalenbor v. Mığırdıç ve Kasbar v. Kigork ve Bogos v. Kirkor ve Arakil v. Bedros nâm zimmîler meclis-i şer‘-i kavîmde sâhib-i arzuhâl Halil Ağa b. Yusuf hâzır olduğu hâlde her biri takrîr-i kelâm edip bâ-hüccet-i şer‘iyye kethüdâmız olan Ebubekir Ağa yedi seneden berû kethüdâlık-ı mezkûru terk ile diyâr-ı âharda sâkin olup esnâfımızın kethüdâsı olmamağla umûrumuz muhtel ve müşevveş ve mezbûr Halil Ağa dahî müstakîm ve her vecihle kethüdâlık uhdesinden gelmeğe kādir ve cümlemizin muhtârı olmağın kadîmde olduğu üzere cânib-i mîrîye senevî üç bin akçe verilmek şartıyla mezbûr Halil Ağa kethüdâ nasb ve yedine müceddeden berât-ı şerîf-i âlîşân i‘tâ olunmak bâbında istid‘â-yı inâyet eyledikleri huzûr-ı âlîlerine i‘lâm olundu. Fî 25 min Ra. sene 1202. Derkenar: Kasab