İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 88 Hüküm no: 57 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Musa’nın bina ettiği evin damlalığının, Yahudihane’nin üzerine gelmesi ve eve ışık girmesini engelleme sebebiyle kaldırılmasının talep edildiği Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel İkinci Kâtib Ahmed Efendi hâssa mi‘mârı hulefâsından Mehmed Akif ve es-Seyyid Hüseyin Halîfeler ile İstanbul’da Balatkapısı hâricinde Karabaş mahallesinde vâki‘ merhûm Perdecibaşı el-Hâc İbrahim Ağa Vakfı’ndan İsak v. Musa nâm Yahûdî’nin bi’l-icâreteyn tasarrufunda olan Yahûdîhâne’ye varıp huzûr-ı Müslimîn’de ba‘de akdi’l-meclis Yahûdîhâne-i mezkûr civârında yine vakf-ı mezbûrdan bir bâb Yahûdîhâne’ye iştirâken mutasarrıflar olan sâhib-i arzuhâl Ali Çelebi b. el-Hâc Ali ile zevcesi ma‘rifetü’z-zât Hadîce bt. Abdullah nâm hatun meclis-i ma‘kûd-ı mezkûrda ba‘dehû meclis-i şer‘de mütevellîsi Adurrahman hâzır olduğu hâlde mersûm İsak Yahûdî muvâcehesinde mersûm İsak Yahûdî bizim ve kendinin sekiz parmak terbî‘an on beş zirâ‘ sekiz parmak arsa kadîmden beru damlalık ve ziyâ içün ter[k] olunmuşiken arsa-i mezkûre üzerine kadîmine muğâyir fuzûlî (...) sundurma binâ eylediğinden mâ‘adâ arsa-i mezkûreyi müstakillen zabt ve bizim Yahûdîhânemizin saçağını kat‘ ve pencerelerini sed murâd etmekle men‘ ve def‘ olunmak matlûbumuzdur deyü da‘vâ eylediklerinde mersûm İsak Yahûdî dahî cevâbında gerçi arsa-i mezkûre kadîmden menzileyn-i mezkûreyn beynlerinde damlalık ve ziyâ içün terk olunup bu âna kadar üzerine binâ vaz‘ olunmadığını mukır ve mu‘terif iken mücerred mazmûnu gayr-ı müsbet işbu yedimde olan temessükde tahrîr olunan on yedi buçuk zirâ‘ arsadan olup ol vecihle bi’l-icâreteyn tasarrufumda olmağla vaz‘-ı yed ederim deyü suret-i def‘de tasaddîsi gayr-i meşrû‘ olduğundan mâ‘adâ arsa-i mezkûre üzerine kadîmden beru binâ’ vaz‘ olunmayıp iki Yahûdîhâne beyninde damlalık ve ziyâ içün terk olunduğunu Halil b. Mehmed ve Mehmed b. Osman nâm kimesnelerden alâ tarîkı’ş-şehâde ba‘de’l-ihbâr mütevellî-i mezbûr dahî tasdîk etmeğin arsa-i mezkûre kadîmi üzre terk olunmak iktizâ etmekle müceddeden binâ eylediği sundurmayı kal‘ ve ref‘a Yahûdî-i mersûma tenbîh olunduğu huzûr-ı âlîlerine i‘lâm olundu. Fî 24 min Ra. sene 1202. Derkenar: Balat’a mahsûs