İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 90 Hüküm no: 61 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Abdullah’ın kiraladığı berber dükkanının başka bir mahalle nakledilmesi ve dükkan sahibine olan kira borcunun ödenmesi Ma‘rûz Sâdır olan fermân-ı âlîlerine imtisâlen İstanbul’da Tahta’l-kal‘a’da vâki‘ bir bâb berber dükkânının iştirâken bi’l-icâreteyn mutasarrıfları es-Seyyid Mustafa Tahir b. Mehmed husûs-ı âtîde kendiden asâleten ve müşterekleri li-ebeveyn er karındaşı es-Seyyid Ahmed ve Derviş Ağa ve vâlidesi Hadîce bt. Salih ve Emetullah bt. Mehmed taraflarından vekîl olduğu zât-ı mezbûretânı ârifân el-Hâc Ahmed b. Hüseyin ve es-Seyyid Abdülkadir b. Hüseyin şehâdetleriyle sâbit olmağla vekâleten Çarşamba günü dîvân-ı âlîlerinde ma‘kûd meclis-i şer‘-i kavîmde dükkân-ı mezkûrda gedik âlâtına mutasarrıfân olan sâhib-i arzuhâl Osman ve Emin b. Halil nâm sagîrânın vâlideleri ve bâ-hüccet-i şer‘iyye vasiyye mansûbeleri zâtı mu‘arrefe Zeyneb bt. Abdullah nâm hatun ile terâfu‘larında sagîrân-ı mezbûrânın babaları mezbûr Halil dükkân-ı mezkûrda beher şehr üçer guruş kirâ ile müste’cirimiz iken bundan akdem ba‘de’l-vefât yine üçer guruş kirâ ile sagîrân-ı mezbûrân içün vasiyyeleri mezbûreye icâr ol dahî ba‘de’l-istîcâr ve’l-kabûl iki yüz senesi Zilhiccesi gurresinden işbu iki yüz iki senesi Rebî‘ü’l-ûlâ gâyetine değin on altı ayda kırk sekiz guruş zimmetinde müctemi‘a olduğundan mâ‘adâ berber esnâfının şurût-ı mer‘iyyeleri üzre biz dükkân-ı mezkûru âhar akâra tebdîl murâd edip işbu târîh-i i‘lâm şehri gâyetinden fesh-i îcâr etmemizle meblağ-ı mezkûru bize edâya ve dükkân-ı mezkûru gâyet-i şehr-i mezbûrda tahliye ve bize teslîme vasiyye-i mezbûre cevâbında ber-vech-i muharrer dükkân-ı mezkûr kirâsından zimmetinde müctemi‘a kırk sekiz guruş deyni olduğunu ikrâr edip lâkin dükkân-ı mezkûr derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmesi sağîrân-ı mezbûrânın [14b] babalarından müntakil temessükleri ve mahallinde mu‘teber olmağla dükkân-ı mezkûru bi’l-vesâye zabt ederim deyü ta‘addî eylediği ref‘-i meşrû‘ ve mu‘teber olduğundan gayrı arzuhâl hâmişinde olan emr-i âlî derkenârında berber dükkânı ashâbı mutasarrıf olduğu dükkânı âhar akâra tebdîl murâd ettikde esnâf-ı sâ’ire misillü gediği âhar mahalle nakl olunmak bâ-emr-i âlî şurût-ı mer‘iyyelerinden olduğu musarrah olmağın mûcebiyle meblağ-ı mezkûr kırk sekiz guruşu müdde‘î-i mezbûra edâya ve gedik-i mezkûru âhar mahalle nakl ile dükkân-ı mezkûru dahî gâyet-i şehr-i merkûmda tahliye ve mutasarrıfları mezbûrûna teslîme vasiyye-i mezbûre Zeyneb Hatun’a tenbîh olunduğu huzûr-ı âlîlerine i‘lâm olundu. Fî 7 min Rebî‘ü’l-âhir sene 1202. Derkenar: Dükkân ihrâcı