İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 91 Hüküm no: 62 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasabbaşı fırın ve değirmeninin sahipleri tarafından tamir edilebilmeleri için kiracıların kira bedellerini ödemesi gerektiği Ma‘rûz Sâdır olan fermân-ı âlîlerine imtisâlen habbâzân tâ’ifesinden olup İstanbul’da Alacahamâm kurbünde vâki‘ Kasabbaşı Fırını dimekle ma‘rûf bir bâb etmekçi fırını ve ittisâlinde bir bâb değirmen gediklerine mutasarrıf olan ashâb-ı arzuhâl Yazıcı es-Seyyid Mehmed b. Osman ve Alemdâr Mehmed Ali b. el-Hâc Mustafa ile Tevkel v. Serkiz meclis-i şer‘-i kavîmde kethüdâ-yı habbâzân ve nizâm ustaları hâzırûn oldukları hâlde fırın ve değirmen-i mezkûr altı sehm i‘tibârıyla bir hissesine mutasarrıfa olan Lebibe Hanım bt. el-merhûm Ragıb Paşa tarafından vekîl-i şer‘îsi İsmail Efendi b. İbrahim ve iki hissesine Emine Hânım’dan tefevvüz ile mutasarrıf olan Osman Ağa b. Halil ve bir hissesine mutasarrıf Agob v. Avanes ve iki hissesine mutasarrıf Şerbetçi Haron v. Arslan Yahûdî muvâcehelerinde her biri takrîr-i kelâm edip fırın ve değirmen-i mezkûrlar murûr-ı zamân ile müşrif-i harâb ve eşedd-i ihtiyâc ile ta‘mîre muhtâc olmağla muktezî olan mahallerini ta‘mîr etmek üzre mutasarrıfları mezbûrûna tenbîh olunmak murâdımızdır dediklerinde anlar dahî cevâblarında gerçi fırın ve değirmen ta‘mîre muhtâcdır lâkin müste’cirlerimiz mezbûrûn kirâlarımızı edâda muhâlefet etmeleriyle binâ’en alâ zâlik ta‘mîrlerine mübâşeret olunmamışidi dediklerinde müste’cirûn-ı mezbûrûn zimmetlerinde müctemi‘ kirâyı ve gerek fîmâ ba‘d iktizâ eden kirâyı bilâ-cevr edâya ta‘ahhüd ve mutasarrıfları mezbûrûn dahî fırın ve değirmen-i mezkûru ta‘mîre ta‘ahhüd eyledikleri huzûr-ı âlîlerine i‘lâm olundu. Fî 15 min Rebî‘ü’l-âhir sene 1202. Derkenar: Fırın