İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 92 Hüküm no: 63 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Camile bt. İsrayil’in kendisi ve kız kardeşine ait olup Arslan v. Nesim’e sattıkları geçit ve gedik hisseleri dolayısıyla açtığı davanın reddolunduğu Ma‘rûz Sâdır olan fermân-ı âlîlerine imtisâlen Havâss-ı refî‘a kazâsına muzâfa Hasköy kasabasında mütemekkine arzuhâl eden şahsı mu‘arrefe Camile bt. İsrayil nâm Yahûdîye Çarşamba günü dîvân-ı âlîlerinde ma‘kûd meclis-i şer‘-i kavîmde arzuhâlde mezkûrü’l-ism ammisi oğlu Yoda Arslan v. Nesim nâm Yahûdî ile terâfu‘larında İstanbul’da Cibalikapısı hâricinde vâki‘ bir bâb şerbethâne derûnunda mevcûde gedik ta‘bîr olunur âlât-ı lâzıme-i ma‘lûme ve geçidin nısfı babam İsrayil’in tasarrufunda iken hâlik oldukda benim ile kız karındaşım Dolde’ye irsen ba‘de’l-intikâl mesfûre Dolde dahî hâlike olup ben hasren vârisesi olmamla nısfı irsen bana intikâl etmişiken mersûm Yoda Arslan Yahûdî nısf-ı âharına mutasarrıf olmağla benim hissemi dahî on üç seneden beru zabt ve benim hissem içün beher şehr kırkar guruş kirâ ahz etmekle sinîn-i mezkûrda muktezî olan cem‘an altı bin iki yüz kırk guruşun kırk guruşunu yedinden ahz edip zimmetinde bâkî altı bin iki yüz guruşu mesfûrdan taleb ederim deyü da‘vâ ettikde ol dahî cevâbında gedik ve geçid-i mezkûrlara mutasarrıf olduğunu ikrâr lâkin yedimde olup bin iki yüz bir senesi Zilka‘desi’nin yirmi yedinci günü târihiyle müverrah hâlâ Şer‘iyyâtî es-Seyyid Ahmed Efendi’nin murâfa‘adan verdiği işbu i‘lâm-ı şer‘î nâtık olduğu üzre müdde‘iyye-i mersûme gedik ve geçid-i mezkûrların nısflarını ber-vech-i muharrer [15a] efendi-i mûmâileyh huzûrunda benden da‘vâ ettikde ben dahî bin iki yüz seksen dokuz senesi Saferi’nde müdde‘iyye-i mersûme ve kızkarındaşı hâlike mesfûre dahî hayâtında gedik ve geçid-i mezkûrlardan olan nısf hisse-i ırsiyyelerini bâ-hüccet-i şer‘iyye semen-i ma‘lûm ve makbûza bana bâtten ve sahîhan bey‘ ve gedik-i mezkûrlara müte‘allika âmme-i da‘vâdan benim zimmetimi ibrâ’-i âm ile ibrâ ve iskât ben dahî kabûl etmişdim deyü ref‘imi müdde‘iyye-i mersûme muvâcehesinde ber-nehc-i şer‘î ba‘de’l-isbât müdde‘iyye-i mersûme bî-vech-i mu‘ârazadan men‘ olunmuşidi deyü takrîrine muvâfık bir kıt‘a i‘lâm-ı şer‘î ibrâz ile ba‘de’r-ref‘ ve’s-suâl müdde‘iyye-i mersûme mazmûn-ı i‘lâm-ı mezkûru ikrâr ve i‘tirâf etmeğin mûcebiyle müdde‘iyye-i mersûme Camile bu def‘a dahî bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 7 min R sene 1202. Derkenar: 60000 men‘