İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 93 Hüküm no: 64 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sava v. Lefter’in 3 adet kasap dükkanına ait dörtte bir gedik hisselerini Kosta v. Preşkova’ya sattığı Ma‘rûz Evkâf-ı hazret-i şehriyârîden Dördüncü Selhhâne’ye merbût olup mahrûse-i Galata’ya muzâfa Ortaköy’de selhhâne önünde vâki‘ bir bâb ve Beşiktaş’da sığır kasabı dükkânına muttasıl bir bâb ve Arnavud karyesinde Kuyubaşı’nda vâki‘ bir bâb ki cem‘an üç bâb kasab dükkânları derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmeleri dört sehm i‘tibârıyla rub‘ hisselerine bâ-temessük-ı mütevellî mutasarrıf olan Sava v. Lefter zimmî meclis-i şer‘-i kavîmde hâlâ kasabbaşı izzetlü Mehmed Emin Ağa tarafından vekîli Kasablar Kethüdâsı el-Hâc Ali Ağa hâzır olduğu hâlde kasab ustalarından Kosta v. Preşkova zimmî muvâcehesinde takrîr-i kelâm edip ber-vech-i muharrrer dekâkîn-i selâsede mutasarrıf olduğum rub‘ âlât-ı mezkûremi hüsn-ı rızâ ve ihtiyârımla bedel-i ma‘lûm mukâbelesinde bâ-re’y-i mütevellî mersûm Kosta zimmîye ferâgat ve kasr-ı [yed] edip fîmâ ba‘d âlât-ı mezkûrenin rub‘ hisselerinde benim kat‘â alâka ve medhalim kalmayıp mersûm Kosta zimmînin hakk-ı mufavvazı olmuşdur dedikde ol dahî ba‘de’t-tasdîk dekâkîn-i selâse-i mezkûrede âlât-ı lâzıme-i ma‘lûmelerinin rub‘ hisseleri mersûm Sava zimmînin kasr-ı yedinden mesfûr Kosta zimmî üzerine defter-i vakfa kayd birle yedine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 13 min Rebî‘ü’l-âhir sene 1202. Derkenar: Ortaköy Kasab