İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 94 Hüküm no: 65 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ebubekir’in, kasap dükkanına ait dörtte bir gedik hissesini Hüseyin b. Halil’e sattığı Ma‘rûz Evkâf-ı hazret-i şehriyârîden Birinci Selhhâne’ye merbût olup İstanbul’da Mahmudpaşa Hamâmı karşısında vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûme dört sehm i‘tibârıyla rub‘ hissesine Kara Mustafapaşa Vakfı mütevellîsi temessüküyle mutasarrıf olan Ali b. Ebubekir nâm kimesne meclis-i şer‘-i kavîmde hâlâ Kasabbaşı Mehmed Emin Ağa tarafından vekîli el-Hâc Ali Ağa hâzır olduğu hâlde kasab ustalarından Hüseyin b. Halil muvâcehesinde takrîr-i kelâm edip ber-vech-i muharrer âlât-ı mezkûreden mutasarrıf olduğum rub‘ hissemi hüsn-ı rızâ ve ihtiyârımla bâ-ma‘rifet-i mütevellî bedel-i ma‘lûm mukâbelesinde mezbûr Hüseyin Usta’ya ferâgat ve kasr-ı yed edip fîmâ ba‘d rub‘ âlât-ı mezkûrede benim kat‘â alâkam kalmayıp mezbûr Hüseyin Usta’nın hakk-ı mufavvazı olmuşdur dedikde ol dahî ba‘de’t-tasdîk ber-vech-i muharrer Kara Mustafapaşa Vakfı mütevellîsinin temessükü cânib-i vakf-ı hümâyûnda hıfz ve âlât-ı mezkûrenin rub‘ hissesi mezbûr Ali’nin ferâğından merkûm Hüseyin Usta üzerine tahrîr ve defter-i vakfa kayd birle yedine müceddeden temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî 21 min Ra sene 1200. Derkenar: Mahmudpaşa’da Kasab