İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 94 Hüküm no: 66 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ali’nin, kasap gedik hisse ve aletlerini, Mehmed ve Mustafa kardeşlere sattığı Ma‘rûz Evkâf-ı hazret-i şehriyârîden Birinci Selhhâne’ye merbût olup İstanbul’da Gedikpaşa’da dört yol ağzında etmekçi fırını ittisâlinde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısfına vakf-ı müşârunileyh mütevellîsi temessüküyle ve nısf-ı âharına dahî Kara Mustafapaşa Vakfı mütevellîsi temessüküyle mutasarrıf olan Ali b. Ali meclis-i şer‘-i kavîmde hâlâ Kasabbaşı Mehmed Emin Ağa tarafından vekîli el-Hâc Ali Ağa hâzır olduğu hâlde yine kasab ustalarından Mehmed ve Mustafa ibney el-Hâc İbrahim muvâcehelerinde takrîr-i kelâm edip ber-vech-i muharrer mutasarrıf olduğum âlât-ı lâzıme-i ma‘lûme-i mezkûremi hüsn-ı rızâ ve ihtiyârım ile bâ-re’y-i mütevellî vakf-ı müşârunileyhe bedel-i ma‘lûm mukâbelesinde mezbûrân Mehmed ve Mustafa nâm karındaşlara ale’l-iştirâki’s-sevî ferâgat ve kasr-ı yed edip fîmâ ba‘d âlât-ı mezkûrede benim kat‘â alâkam kal[ma]mağla mezbûrânın hakk-ı mufavvazı olmuşdur dedikde anlar dahî ba‘de’t-tasdîk ber-vech-i meşrûh Kara Mustafapaşa Vakfı temessükü cânib-i vakf-ı hümâyûnda hıfz ve âlât-ı mezkûre mezbûr Ali’nin ferâğından mezbûrân Mehmed ve Mustafa üzerlerine tahrîr ve defter-i vakfa kayd birle yedlerine müceddeden temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî 21 min R sene 1202.