İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 96 Hüküm no: 68 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü el-Hâc Ahmed b. Ali’nin, Kömürcü Kürt Mehmed b. Mustafa’dan alacağını talep ettiği Ma‘rûz Sâhib-i arzuhâl Kömürcü el-Hâc Ahmed b. Ali nâm kimesne meclis-i şer‘-i münîrde arzuhâlde mezkûrü’l-ism Kömürcü Kürt Mehmed b. Mustafa ile terâfu‘larında merkûm Mehmed zimmetinde iki ay mukaddem yedinden iştirâ ve kabz eylediği ma‘lûmü’l-mikdâr kömür semeninden bin iki yüz kırk guruş ve cihet-i karzdan dahî yüz altmış guruş ki cem‘an bin dört yüz guruş hakkımın yedi yüz altmış beş guruşunu nakden ve kömür ile istîfâ ve ba‘de’l-hesâbi’s-sahîh zimmetinde bâkî altı yüz otuz beş guruş hakkım içün karz unvânıyla işbu deyn temessükünü yedime ba‘de’l-i‘tâ meblağ-ı bâkî-i mezkûrun edâsına dâmadı işbu Mustafa b. Süleyman dahî kefîl ve zâmin oldukdan sonra meblağ-ı bâkî-i mezkûrun dahî iki def‘a da yüz doksan altı guruşunu bana edâ edip bâkî dört yüz otuz dört guruş deyninin iki yüz yirmi guruşuna mahsûb olmak üzere dâmâdı mezbûr ma‘rifetiyle vezn olunan on bir bin kıyye kömürü mahsûb etmemekle meblağ-ı bâkî-i mezkûr dört yüz otuz dokuz guruşu merkûm Kürt Mehmed’den taleb ederim deyü ba‘de’d-da‘vâ ve’l-istintâk merkûm Kürt Mehmed cevâbında ber-vech-i muharrer ahz ve i‘tâmız hesâb olundukda zimmetimde dört yüz otuz dokuz guruş deynim bâkî kalmışiken iki yüz guruş ribâ zammıyla cem‘an altı yüz otuz beş guruş deynim olmak üzre müdde‘î-i mezbûra temessük ve ikrâr vermişidim lâkin ber-vech-i muharrer meblağ-ı mezkûr altı yüz otuz beş guruşun iki yüz guruşu ribâdır deyü tasaddî eylediği ref‘ini beyândan izhâr-ı acz edip müdde‘î-i mezbûr el-Hâc Ahmed’e bi’t-taleb tahlîf-i şer‘î olunmağın mûcebiyle meblağ-ı bâkî-i mezkûr dört yüz otuz dokuz guruşu müdde‘î-i merkûma edâ ve teslîme mezbûr Kürt Mehmed’e tenbîh olunduğu huzûr-ı âlîlerine i‘lâm olundu. Fî 24 min R. sene 1202.