İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 97 Hüküm no: 69 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liko v. Niko’nun kasap dükkanı gedik hisse ve aletlerini, Lazari v. Koli’ye sattığı Ma‘rûz Evkâf-ı hazret-i şehriyârîden Üçüncü Selhhâne’ye merbût olup mahrûse-i Galata’da Vâlide Çeşmesi kurbünde vâki‘ bir bâb ve Azabkapısı hâricinde kâ’in bir bâb ki cem‘an iki bâb kasab dükkânları derûnlarında mevcûde beyne’l-hıref gedik ta‘bîr olunur âlât-ı lâzıme-i ma‘lûmenin nısflarına bâ-temessük-ı mütevellî mutasarrıf olan Liko v. Niko nâm zimmî meclis-i şer‘-i kavîmde hâlâ Kasabbaşı Mehmed Emin Ağa ve tarafından vekîli Kasablar Kethüdâsı el-Hâc Ali Ağa hâzır olduğu hâlde kasab ustalarından Lazari v. Koli tarafından tasdîka vekîl-i şer‘îsi kebîr oğlu Koli zimmî muvâcehesinde takrîr-i kelâm edip ber-vech-i muharrer mutasarrıf olduğum nısf-ı âlât-ı mezkûremi hüsn-ı rızâ ve ihtiyârımla bâ-ma‘rifet-i mütevellî bedel-i ma‘lûm mukâbelesinde müvekkîl-i mersûm Lazari zimmîye ferâgat ve kasr edip fîmâ ba‘d nısf-ı âlât-ı mezkûrede benim kat‘â [17a] alâka ve medhalim kalmayıp müvekkil-i mersûmun hakk-ı mufavvazı olmuşdur dedikde vekîl-i mesfûr Koli zimmî dahî ba‘de’t-tasdîk mârrü’z-zikr iki bâb dükkânlar derûnlarında olan âlât-ı lâzıme-i ma‘lûmenin nısfları mesfûr Liko zimmî ferâğından müvekkil-i mersûm Lazari zimmî üzerine tahrîr ve defter-i vakfa kayd birle yedine müceddeden temessük [17a] i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî 23 min Rebî‘ü’l-âhir sene 1202.