İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 98 Hüküm no: 70 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âişe bt. Hüseyin’in evini el-Hâc Mehmed Ağa b. Mustafa’ya sattığı Ma‘rûz Zikri âtî vakf menzilin bi’l-icâreteyn mutasarrıfesi zâtı mu‘arrefe Âişe bt. Hüseyin nâm hatun meclis-i şer‘-i münîrde Kömürcü Mustafa Ağa Vakfı’nın mütevellîsi es-Seyyid Mehmed Emin Efendi tarafından vekîli Molla Musa hâzır olduğu hâlde sâhib-i arzuhâl hâssa hasekîlerinden el-Hâc Mehmed Ağa b. Mustafa muvâcehesinde takrîr-i kelâm edip zevcim işbu es-Seyyid Halil’in mezbûr el-Hâc Mehmed Ağa’ya deyni olan altı yüz seksen iki guruş mukâbelesinde vakf-ı mezbûrdan İstanbul’da Muhsine Hatun mahallesinde vâki‘ ber-mûceb-i temessük ma‘lûmü’l-hudûd ve’l-müştemilât mutasarrıfe olduğum bir bâb menzilimi rızâm ile bâ-re’y-i mütevellî mezbûr el-Hâc Mehmed Ağa’ya vefâ’en ba‘de’l-ferâğ mezbûr el-Hâc Mehmed Ağa ferâğ-ı mezkûr-ı kat‘îdir deyü bin iki yüz bir senesi Cumâde’l-âhiresi’nin on altıncı günü menzil-i mezkûru benden taleb ve da‘vâ ettikde ben dahî deyn-i mezkûru târîh-i mezbûrdan altı ay tamâmına değin edâ müyesser olmaz ise menzil-i mezkûru tahliye ve kendiye teslîme ba‘de’t-ta‘ahhüd müddet-i mezkûre tamâm olup deyn-i mezkûru edâ müyesser olmamağla menzil-i mezkûru yedi yüz on iki guruş mukâbelesinde ferâğ-ı kat‘î-i mu‘teber ile bâ-ma‘rifet-i mütevellî-i mezbûr el-Hâc Mehmed Ağa’ya ba‘de’l-ferâğ ve’l-kabûl bedel-i mezkûrun otuz guruşunu mezbûrun yedinden ahz u kabz edip bâkî altı yüz seksen iki guruşunu zevcim mezbûrun deyni olan meblağ-ı mezkûr altı yüz seksen iki guruşa ba‘de’t-takâs ve’l-mukâssa ve’l-kabûl menzil-i mezkûrda benim kat‘â alâka ve medhalim kalmayıp mezbûr el-Hâc Mehmed Ağa’nın hakk-ı mufavvazı olmuşdur dedikde mezbûr el-Hâc Mehmed Ağa dahî tasdîk ve bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 25 min Rebî‘ü’l-âhir sene 1202.