İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 98 Hüküm no: 71 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber esnafına es-Seyyid Osman’ın şeyh olarak tayin edildiği Ma‘rûz İstanbul’da berber esnâfının kethüdâsı İdris Ağa b. Ahmed ve şeyhleri Abdullah Efendi b. Ahmed ve Yiğitbaşı Mehmed Sadık b. Abdülkerim ve Çavuş Salih b. Ali ve ustalarından es-Seyyid Mehmed b. Ali ve el-Hâc Ahmed b. Ali vesâ’ir mazbûtü’l-esâmî ustalar meclis-i şer‘-i kavîmde yine esnâf-ı mezbûre ustalarından es-Seyyid Osman b. es-Seyyid İsmail hâzır oldukları hâlde esnâfımıza du‘âcı olan kimesne fevt oldukda yerine yine esnâfımız ustalarından muhtârımız ve du‘âcılık-ı mezkûra mahal ve müstehak olan kimesne du‘âcı nasb ve ta‘yîn olunmak nizâm-ı kadîm-i mer‘iyyemizden olmağla bilâ ta‘yîn bâ-berât-ı âlî esnâfımıza du‘âcı olan İbrahim b. Abdullah fevt olup ve mezbûr es-Seyyid Osman du‘âcılık-ı mezkûra vücûhla mahal ve müstehak ve cümlemizin muhtârıdır deyü her biri ihtiyâr ve iltimâs etmeleriyle du‘âcılık-ı mezkûr müteveffâ-yı mezbûr İbrahim mahlûlünden esnâf-ı mezbûrenin muhtârları olan merkûm es-Seyyid Osman’a tevcîh ve yedine berât-ı şerîf-i âlîşân inâyet ve ihsân buyurulmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 28 R. sene 1202.