İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 99 Hüküm no: 72 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâce Hadîce Hatun Vakfı’na ait yanmış olan ev ve arsasını Nefise bt. Abdullah’a kiraladığı Ma‘rûz İstanbul’da Sofîler mahallesinde vâki‘ merhûme Hâce Hadîce Hatun nâm sahîbe’l-hayrın çeşmesi vakfının bi’l-meşrûta mütevellîsi el-Hâc Mustafa Efendi b. el-Hâc Mehmed meclis-i şer‘-i münîrde sâhibe-i arzuhâl zâtı mu‘arrefe Nefise bt. Abdullah nâm hatun muvâcehesinde bi’t-tevliye takrîr-i kelâm edip vakf-ı mezbûr müstegallâtından mahalle-i mezbûrede vâki‘ ber-mûceb-i temessük ma‘lûmü’l-hudûd ve’l-müştemilât bir bâb menzilin ebniye ve arsasını vâkıfe-i mezbûre hayâtında vakfına mütevelliye iken bin yüz doksan altı senesi Cumâde’l-âhiresi’nin yirminci günü yevmî beş akçe icâre-i mü’eccele dört bin guruş mu‘accele ile mezbûre Nefîse Hatun’a bi’t-tevliye îcâr ve teslîm ve yedine mümzâ ve mahtûm temessük i‘tâ ol dahî ber-vech-i istîcâr ve kabûl ve tesellüm edip menzil-i mezkûr bi’l-icâreteyn tasarrufunda iken harîk-i kebîrde ebniyesi muhterike oldukdan sonra bin iki yüz senesi Zilka‘desi gurresinde bâ-irzâ fesh-i îcâr birle âhara îcâr olunmak içün cânib-i vakfa bırakmakla âhara îcâr ederim deyü da‘vâya tasaddî etmişidim lâkin mezbûre Nefîse Hatun fesh-i icâreyi inkâr ve ben dahî beyâna kādir olmayıp ve arsa-i mezkûre üzerine teberru‘an li’l-vakf menzil binâsıyla istîcârına kimesne rağbet etmediği ecilden alâ hâlihî terk olunması vakf-ı mezkûre muzır ve târîh-i temessükden berû altı senede müctemi‘a olan doksan guruş icâre-i mü’ecceleyi edâ ve arsa-i mezkûre üzerine teberru‘an li’l-vakf menzil binâsına mezbûre Nefîse Hatun müte‘ahhide olmağın ben dahî nef‘an li’l-vakf da‘vâ-yı mezkûremden fâriğ olup arsa-i mezkûreyi icâre-i kadîmesiyle yine mezbûre Nefîse Hatun tasarrufunda ibkâ ile bi’t-tevliye tasarrufuna izin verdiğimde ol dahî ber-vech-i muharrer kabûl eyledi dedikde mezbûre Nefîse Hatun dahî tasdîk ve bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 29 min R sene 1202.