İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 100 Hüküm no: 73 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Hasan’ın, kasap dükkanı gedik hisse ve aletlerini es-Seyyid Ahmed’e sattığı Ma‘rûz Evkâf-ı hazret-i şehriyârîden Dokuzuncu Selhhâne’ye merbût olup Üsküdar’da kolluk karşısında vâki‘ sebzeci dükkânına muttasıl bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin bâ-temessük-ı mütevellî nısf hisse-i şâyi‘asına mutasarrıf olan İsmail b. Hasan meclis-i şer‘-i münîrde hâlâ Kasabbaşı Mehmed Emin Ağa ve Kasablar Kethüdâsı el-Hâc Ali Ağa vesâ’ir ustalar hâzırûn oldukları hâlde yine kasab ustalarından es-Seyyid Ahmed b. es-Seyyid İbrahim muvâcehesinde takrîr-i kelâm edip ber-vech-i muharrer mutasarrıf olduğum nısf-ı âlât-ı lâzıme-i ma‘lûmemi hüsn-ı rızâ ve ihtiyârımla bâ-re’y-i mütevellî bedel-i ma‘lûm mukâbelesinde mezbûr es-Seyyid Ahmed’e ferâgat ve kasr-ı yed edip fîmâ ba‘d nısf âlât-ı mezkûrda benim kat‘â alâka ve medhalim kalmayıp mezbûr es-Seyyid Ahmed’in hakk-ı mufavvazı olmuşdur dedikde ol dahî ba‘de’t-tasdîk nısf-ı âlât-ı mezkûre merkûm İsmail’in ferâğından mezbûr es-Seyyid Ahmed üzerine tahrir ve defter-i vakfa kayd birle yedine müceddeden temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 28 min R. sene 1202.