İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 100 Hüküm no: 74 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hasan b. el-Hâc Mustafa’nın kasap dükkanı gedik hisse ve aletlerini, Dimitri ve Duka’ya sattığı Ma‘rûz Evkâf-ı hazret-i şehriyârîden Beşinci Selhhâne’ye merbût olup Üsküdar’a muzâfa Kanlıca kasabasında vâki‘ bir bâb kasab dükkânı derûnunda mevcûde gedik ta‘bîr olunur âlât-ı lâzıme-i ma‘lûmenin rub‘ hissesine bâ-temessük-ı mütevellî mutasarrıf olan el-Hâc Hasan b. el-Hâc Mustafa nâm kimesne meclis-i şer‘-i şerîf-i enverde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa hâzır olduğu hâlde kasab ustalarından Dimitri v. Harito ve Duka v. Çato nâm zimmîler muvâcehelerinde takrîr-i kelâm edip ber-vech-i muharrer mutasarrıf olduğum rub‘ âlât-ı mezkûremi hüsn-ı rızâ ve ihtiyârımla bâ-re’y-i mütevellî bedel-i ma‘lûm mukâbelesinde mersûmân Dimitri ve Duka zimmilere ale’l-iştirâki’s-sevî ferâgat ve kasr-ı yed edip fîmâ ba‘d rub‘ âlât-ı mezkûrede benim kat‘â alâka ve medhalim kalmayıp mersûmânın hakk-ı mufavvazları olmuşdur dedikde mersûmân dahî ba‘de’t-tasdîk rub‘ âlât-ı mezkûre mezbûr el-Hâc Hasan ferâğından mersûmân Dimitri ve Duka zimmîler üzerlerine tahrîr ve defter-i vakfa kayd birle yedlerine temessük ve i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî gurre-i Ca. sene 1202.