İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 101 Hüküm no: 75 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’a babasından intikal eden vakıf ev hissesine müdahale eden Saide Hanım’ın men edilmesi Ma‘rûz İstanbul’da Edirnekapısı dâhilinde Acıçeşme kurbünde Hadîce Sultan mahallesinde sâkin iken bundan akdem fevt olan kuzâtdan İbrahim Efendi b. Mehmed’in sulbiye kebîre kızı ma‘rifetü’z-zât sâhibe-i arzuhâl Fatma Hatun meclis-i şer‘-i enverde müteveffâ-yı mezbûrun zevce-i menkûha-i metrûkesi ve sagîre kızı Rafia’nın vâlidesi derûn-ı arzuhâlde mezkûre ma‘rifetü’z-zât Saide bt. Mehmed nâm hatun mahzarında zikri âtî vakfın kâ’immakâm-ı mütevellîsi Mehmed Habib Efendi hâzır olduğu hâlde ashâb-ı hayrâtdan merhûme Hâce Âişe Hatun Vakfı musakkafâtından mahalle-i mezbûrede vâki‘ ma‘lûmü’l-hudûd hâriciye ve dâhiliyede büyût-ı adîde ve müştemilât-ı sâ’ireyi hâvî bir bâb vakf menzil babam müteveffâ-yı mezbûrun ile’l-vefât bi’l-icâreteyn taht-ı tasarrufunda ve ba‘de vefâtihî bana ve kızkarındaşlarım sagîre-i mezbûre ile gâ’ibe ani’l-beled Hamide Hatun’a intikâl-i âdî ile intikâl etmişken üvey vâlidem merkûme babam mezbûrun vefâtından sonra menzil-i mezkûrun hâriciyesini kendi üzerine tahrîr ve vakf-ı merkûm mütevelliyesi Selime Hatun’a temhîr etdirdiğine binâ’en menzil-i mezkûrun hâriciyesini füzûlî zabt etmekle hârice-i mezkûreden âdiyen bana intikâl eden sülüs hissemden kasr-ı yed ve bana teslîme üvey vâlidem mezbûreye tenbîh olunmak matlûbumdur deyü da‘vâ eylediğimde mezbûre Saide Hatun dahî cevâbında müteveffâ-yı mezbûr İbrahim Efendi hâl-i hayât ve kemâl-i akl u sıhhatinde bin iki yüz bir senesi Cumâde’l-ûlâsı gurresinde vefâtından on gün mukaddem menzil-i mezkûrun hâriciyesini kendi hüsn-ı rızâsı ve tayyib-i ihtiyârı ve ferâğ-ı kat‘î-i mu‘teber ile huzûr-ı Müslimînde ve mütevelliye-i vakf-ı mezbûre Selime Hatun hâzır olduğu hâlde bana ferâğ ve tefvîz ve mütevelliye-i [18b] mezbûre dahî tasarrufuma izin ve temhîr etmişdir deyü eylediği def‘ini lede’t-tezkiye makbûlü’ş-şehâde idükleri ihbâr olunan Mehmed Emin b. el-Hâc Mustafa ve Yusuf Alemdâr b. Ali şehâdetleriyle vech-i şer‘î üzere isbât ve kâ’immakâm-ı mütevellî-i mezbûr dahî menzil-i mezkûrun hâriciyesinde mezbûre Saide Hatun’un tasarrufunu re’y etmeğin mûcebince müdde‘iyye-i mezbûre menzil-i mezkûrun hârciyesinden sülüs hisse mutâlebesiyle mezbûre Saide Hatun’a bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 24 min Rebî‘ü’l-âhir sene 1202.