İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 102 Hüküm no: 76 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa ve Rukiye Hatun’un evi ile Abdullah Ağa’nın evinin arasına tahtadan bir duvar yapılıp pencerelerinden diğer evin pencerelerine bakan tarafların kapatılması Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel Ahmed Efendi hâssa mi‘mârı hülefâsından el-Hâc Mehmed Emin ve diğer Mehmed Emin halîfeler ile İstanbul’da Avratbazarı kurbünde Kürkçübaşı mahallesinde vâki‘ derûn-ı arzuhâlde isimleri mezkûr Şekerci İbrahim Ağa b. Lütfullah ile zevcesi ma‘rifetü’z-zât Rukiye bt. Abdullah nâm hatunun Hüsne Hatun Vakfı’ndan gallesi mahalle-i mezbûre müezzinlerine meşrûta iştirâken mutasarrıf oldukları menzile varıp huzûr-ı müslimînde ba‘de akdi’l-meclis menzil-i mezkûr ittisâlinde kâ’in bir bâb vakf menzile mutasarrıf olan sâhib-i arzuhâl Abdullah Ağa b. Abdurrahman meclis-i ma‘kûd-ı mezkûrda vakf-ı mezbûr mütevellîsi Müezzin el-Hâc İsmail Efendi hâzır olduğu hâlde mezbûrân İbrahim Ağa ve Rukiye Hatun mahzarlarında mezbûrânın mutasarrıf oldukları işbu akd-i meclis olunan menzillerinin ulyâ ve vustâda olan dehlizlerinden benim menzilimin makkarr-ı nisvân olan ulyâ ve vustâda olan oda ve mahall-i sâ’irelerine nezâret ve zarar-ı bîni men‘ ve def‘ olunmak matlûbumuzdur deyip tarafeynin ber-vech-i muharrer âhara zarar-ı bînleri bi’l-mu‘âyene zâhir oldukdan sonra beyinlerine bâ-vesâtat muslıhîn mezbûrân İbrahim Ağa ve Rukiye Hatun menzileyn-i mezkûreyn beyninde mevcûd kendi duvarları üzerine bir boy kanadlık tahtadan mi‘mârân-ı mezbûrân mesâhalarıyla tûlen dokuz zirâ‘ tahta havâle ile nezâretlerini def‘a ba‘de’t-ta‘ahhüd mezbûr Abdullah Ağa dahî ulyâda olan odasının bir aded penceresinin zahrı takozlu yek kanad ile nezâretini def‘a ta‘ahhüd ve bu vecihle kat‘-ı münâza‘a eylediklerini mevlânâ-yı mezbûr mahallinde ba‘de’t-tahrîr ümenâ’-i şer‘le inhâ eyledikleri huzûr-ı âlîlerine i‘lâm olundu. Fî 3 min Ca sene 1202.