İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 102 Hüküm no: 77 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simaven’in, Agob ve Bogos’a açtığı fırın ve değirmen hissesi davasının reddolunduğu Ma‘rûz Havâss-ı refî‘a kazâsına muzâfa Hasköy kasabasında mütemekkin iken otuz sene mukaddem hâlik olan Dinoz v. Karabet nâm zimmînin veresesinden sulbî oğlu arzuhâl eden Simaven nâm Ermeni meclis-i şer‘-i kavîmde derûn-ı arzuhâlde isimleri mezkûr Agob v. Bedros ve Bogos v. Hacar nâm zimmiler muvâcehelerinde takrîr-i kelâm edip mârrü’z-zikr Hasköy’de vâki‘ beş bâb etmekçi fırınları ve fırın-ı mezkûrlara merbût [19a] yirmi iki horoslu değirmenlar derûnlarında mevcûde gedik ta‘bîr olunur seksen iki re’s bargir vesâ’ir âlât-ı lâzıme-i ma‘lûmelerinden babam mesfûrun rub‘ hissesini hayâtında mersûm Bogos ile mesfûr Agob’un babası Bedros fuzûlî zabt edip babam mesfûr ile cümlesi bir belde de mütemekkinler iken babam mesfûr ihmâl ile yirmi beş sene bilâ özr sükût ve terk-i da‘vâ edip babam mersûm ba‘de’l-helâk ve yetmiş beş târihinde İstanbul Kadısı Mehmed Murad Efendi huzûrunda bi’l-verâse mesfûrândan taleb eylediğimde yirmi beş seneden berû bilâ özr terk olunan da‘vânın istimâ‘ı câyiz değildir deyü da‘vâ-yı mezkûreme iltifât olunmayıp ba‘dehû mesfûrâna takrîr üzere Agob ve Bogos beni dahî bir takrîb avk ve te’hîr ve men‘ etmeleriyle ben dahî yirmi yedi seneden berû bilâ özr sükût ile da‘vâ-yı mezkûremi terk etmişidim elhâletü hâzihî rub‘ hisse-i mezkûreyi bi’l-verâse mesfûrândan taleb ederim deyü takrîri üzre yirmi beş sene babası mesfûr hayâtında ba‘dehû yirmi yedi sene dahî müdde‘î-i mesfûr bilâ özr sükût ile terk eyledikleri da‘vâ-yı mezkûrenin istimâ‘ı câyiz olmamağla bu def‘a dahî müdde‘î-i mezbûrun da‘vâ-yı mezkûresine iltifât olunmayıp bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 21 min R. sene 1202.