İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 103 Hüküm no: 78 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Osman’ın kızkardeşlerine açtığı veraset davasından vazgeçtiği Ma‘rûz İstanbul’da Nişancı-ı Cedîd kurbünde vâki‘ bir bâb bakkâl dükkânı derûnunda mevcûde beyne’l-hıref gedik ta‘bîr olunur âlât-ı ma‘lûme-i memlûkenin mutasarrafı olup bundan akdem vefât eden Bakkâl es-Seyyid Mehmed b. Halil’in verâseti zevcesi Hanife bt. İbrahim ile sulbiye kebîre kızları Şerîfe Habîbe ve Şerîfe Hadîce’ye ve li-ebeveyn er karındaşları es-Seyyid Osman ve es-Seyyid Hüseyin ve es-Seyyid Ali’ye inhisârı tahakkukundan sonra mezbûr es-Seyyid Osman Çarşamba günü dîvân-ı âlîlerinde ba‘dehû du‘âhânemizde ma‘kûd meclis-i şer‘-i münîrde sâhibeteyyi arzuhâl zâtları mu‘arrefe mezbûretân Şerîfe Habîbe ve Şerîfe Hadîce muvâcehelerinde takrîr-i kelâm edip mûrisimiz müteveffâ-yı mezbûr es-Seyyid Mehmed maraz-ı metvinde tasarrufât-ı şer‘iyyesi nâfize değil iken âlât-ı mezkûreyi mezbûretâna munâsafaten bey‘a ve Bakkâl Yorgi zimmetinde alacak hakkı olan beş yüz guruşu dahî hîbeye tarafeynden es-Seyyid İbrahim Efendi’yi tevkîl ol dahî huzûr-ı şer‘de bi’l-vekâle âlât-ı mezkûreyi iki yüz yetmiş guruşa mezbûretâna bey‘ ve meblağ-ı mezkûru dahî ba‘de’l-hibe karındaşım mezbûr sâhib-i firâş olduğu hâlde on dört gün mürûrunda fevt ve ber-vech-i muharrer bey‘ ve hibesi gayr-ı sahîh olmağla âlât-ı mezkûre ve meblağ-ı mezkûr ber-minvâl-i muharrer bizlere mevrûs olmağın âlât ve meblağ-ı mezkûrdan hisse-i ırsiyyeyi taleb ederim deyü ba‘de’d-da‘vâ ve’l-istintâk mezbûretân cevâblarında babamız mezbûru bir seneden mütecâviz sıhhat-i hükmünde olan maraz-ı müzmine mübtelâ ve tasarrufât-ı şer‘iyyesi nâfize ve mu‘tebere olduğu hâlde ber-vech-i muharrer bey‘ ve hîbe etmişidi deyip ve ber-vech-i muharrer müdde‘âlarına Hasan Efendi b. Mehmed ve Molla Mustafa b. Osman nâm kimesneler şehâdet-i şer‘iyye edip tezkiye olunmak üzre iken müdde‘î-i mezbûr es-Seyyid Osman Ağa da‘vâ-yı mezkûresinden fâriğ olup âlât-ı mezkûre ve meblağ-ı [19b] mezkûrdan hisse-i ırsiyye mutâlebesine müte‘allika âmme-i da‘vâdan mezbûretân Şerîfe Habibe ve Şerîfe Hadîce’nin zimmetlerini ba‘de’l-ibrâ ve’l-kabûl bu vecihle kat‘-ı münâza‘a eyledikleri huzûr-ı âlîlerine i‘lâm olundu. Fî gurre-i Ca sene 1202.