İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 104 Hüküm no: 79 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeblerin ellerindeki koyun ve keçiyi rayici üzere kasaplara dağıtmaları Ma‘rûz Asitâne-i aliyye’de sâkin ibâdullâhın akavât-ı yevmiyeleri içün kasab tâ’ifesi bu esnâda zikri âtî ağnâm tevzî‘ine eşedd-i ihtiyâc ile muhtâc olmalarıyla inâyetlü semâhatlü ağapaşa hazretleri ve kasabbaşı ağa ve kasablar kethüdâsı ve ustaları hâzırûn oldukları hâlde arzuhâl eden Kazganlı celebânı yedlerinde mevcûd olup eyyâm-ı şitâ içün müretteb olan ağnâmı sene-i sâbıkada mübâya‘a olunduğu üzre lühûm ve iç yağlarının beher kıyyesini dokuzar pâreye kasabâna anlar dahî ibâdullâha onar pâreye bey‘ etmek üzere celebân-ı mesfûrûna teklîf olundukda celebân dahî cevâblarında yedimizde olan ağnâmı sene-i sâbıkadan ziyâde bahâ ile iştirâ eylediğimizden mâ‘adâ şa‘îrin bahâsı dahî ezyed olmağla ber-vech-i muharrer beher kıyyesini kasabâna onar pâreden noksân ile verdiğimiz sûretde her birimiz küllî mutazarrır oluruz deyü ber-vech-i muharrer mübâya‘aya râzı olmayıp lâkin ba‘dehû akd olunan meclis-i sânîde yine paşa-yı müşârunileyh hazretleri taraf-ı bâhirü’ş-şereflerinden Yazıcı Mehmed Efendi ve kethüdâ-yı mezbûr ve kasab ustaları hâzırûn oldukları hâlde ber-minvâl-i muharrer koyun ve keçinin lühûm ve iç yağlarının beher kıyyesini sene-i sâbık misillü dokuzar pâreye kassâbâna ve kasablar dahî onar pâreye ibâdullâha bey‘ etmek üzre her biri râzılar ve yedlerinde olan ağnâm ve keçiyi bilâ te’hîr âcilen kassâbâna tevzî‘ ve teslîm etmek üzre ta‘ahhüd eyledikleri huzûr-ı âlîlerine i‘lâm olundu. Fî gurre-i Ca sene 1202.