İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 105 Hüküm no: 81 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ahmed’in Sultan Hamamı’nda eşyalarının çalındığına dair davasını ispat edememesi sebebiyle davanın reddolunduğu Ma‘rûz Sâhib-i arzuhâl es-Seyyid Ahmed b. es-Seyyid Mustafa nâm kimesne meclis-i şer‘-i münîrde İstanbul’da Sultân Hamâmı’nda Hamâmcı Mustafa b. İlyas nâtırlarından İslam b. İbrahim ve Hüseyin b. Ebabekir ve Haşo b. Mustafa nâm kimesneler muvâcehelerinde takrîr-i kelâm edip dünkü Cum‘a günü ba‘de tulû‘i’ş-şems gasl içün hamâm-ı mezkûr câmekânına vardığımda mezbûrûn şuraya soyun deyü bana mahal gösterip ben dahî soyunup derûn-ı hamâmda iken mâlımdan mecmû‘ı kırk yedi guruş kıymetli iki anterî ve bir zümrüd küpe ve harçlı tesbîh ile on aded İstanbul nısfiyesi ve dört aded zer-i mahbûb İstanbûlî ve bir yaldız altunı ve iki altmışlık ve bir rub‘iyyem mahall-i mezkûrdan sirka olunup zâyi‘ olmağla mezbûrundan tazmîn taleb ederim deyü ba‘de’d-da‘vâ ve’l-istintâk [20b] mezbûrûn cevâblarında gerçi müdde‘î-i mezbûr yevm-i merkûmda hamâm-ı mezkûra dâhil olmuşidi lâkin biz ber-vech-i muharrer mezbûra mahal göstermediğimizden mâ‘adâ müdde‘î-i mezbûrun ol mikdâr akçe ve eşyâsı sirka ve zâyi‘ olduğu ma‘lûmumuz değildir deyü her biri inkâr eylediklerinde müdde‘î-i mezbûrdan ber-vech-i muharrer müdde‘âsına beyyine taleb olundukda ityân-ı beyyineden izhâr-ı acz etmekle bi’t-taleb mezbûrûndan her biri tahlîf-i şer‘î olunmalarıyla müdde‘î-i mezbûr es-Seyyid Ahmed’e bilâ beyyine bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 9 min Ca. sene 1202.