İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 106 Hüküm no: 82 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı esnafının ihtiyaç duydukları odunlar için 6 ocak belirlendiği bunların dışındaki korulardan odun kesilip İstanbul’a nakledilmemesi Ma‘rûz Sâdır olan fermân-ı âlîlerine imtisâlen Âsitâne-i aliyye ve tevâbi‘inde vâki‘ hamâmcı esnâfından ashâb-ı arzuhâl Yiğitbaşı es-Seyyid Mehmed Sadık Ağa ve Du‘âcı Hâfız Mehmed Emin Efendi ve Kâtib Mustafa Ağa ve el-Hâc İsmail Ağa ve el-Hâc İbrahim Ağa ve Ali Ağa ve Osman Ağa ve Musa Ağa ve Mustafa Ağa vesâ’ir mazbûtü’l-esâmî hamâmcı ustaları meclis-i şer‘-i münîrde inâyetlü re’fetlü ağapaşa hazretleri taraf-ı bâhirü’ş-şereflerinden hamâmlar üzerine ta‘yîn olunan Yazıcı Şükrü b. Ahmed Efendi ve hâlâ İstanbul Ağası el-Hâc Mustafa Ağa hâzırân oldukları hâlde İstanbul ahâlîsinden olup Yalakâbâd ve Gemlik kazâlarında vâki‘ cibâl-i mübâhaden odun kat‘ eden derûn-ı arzuhâlde isimleri mastûr odunculardan mazbûtü’l-esâmî kimesneler muvâcehelerinde her biri takrîr-i kelâm edip bundan akdem tevârîh-i muhtelifede yedimize verilen evâmir-i aliyye-i müte‘addide de tasrîh olunduğu üzere koru-yı hümâyûna kat‘â duhûl ve hatab kat‘ olunmamak şartıyla ibâdullâhın refâh halleriçün cibâl-i mübâhaden hamâm tomruğu vesâ’ir hatab kat‘ ve İstanbul’a nakl etmek üzre her biri ocak ta‘bîr olunur yerlerden beş nefer kimesneler ta‘yîn olunup anlar dahî yalnız cibâl-i mubâhaden hatab ve tomruk kat‘ ve eyyâm-ı şitâda dahî beher çekisini kırk beşer pâreye füruht ederler iken iki üç seneden berû İstanbul ahâlîsinden ve muhtekir makûlesinden yirmi neferden mütecâviz kimesne zuhûr ve odunculuğa şürû‘ ve ihtikâra mübâşeret edip hattâ bu esnâda Âsitâne-i aliyye’ye nakl eyledikleri hamâm tomruğunun beher çekisini elli beşer ve altmışar pâreye füruht etmeleriyle her birimiz mutazarrır ve hamâmlarımızı idâreye iktidârımız kalmadığından mâ‘adâ mezbûrûn mazbût olmayıp kesretlerine binâ’en cibâl-i mubâhaye adem-i kanâ‘at ile muğâyir-i hatt-ı hümâyûn koru-yı hümâyûna tecâvüz etmeleriyle fîmâ ba‘d mezbûrûn oduncular ta‘ahhüdleri üzre maktû‘ ve mevcûd hatablarını Âsitâne-i aliyye’ye nakl eylediklerinde yalnız eyyâm-ı şitâda beher çekisini kırk beşer pâreye füruht edip ziyâdeye [21a] bey‘ eder olur ise te’dîb olunup evâmir-i aliyyede zikr olunduğu üzre Gemlik kazâsında Ağazâde es-Seyyid Mehmed Bey ma‘rifetiyle yerlülerden Kumla-i sagîr ve Kumla-i kebîr’de birer kimesne ve Yalakâbâd kazâsında Ömer Ağa ve Samanlı’da bir kimesne ve Kulalı Çiftliği sâhibi es-Seyyid el-Hâc Mustafa Ağa ve Arpacı el-Hâc Hüseyin’den her biri birer ocak i‘tibârıyla cem‘an altı ocak ta‘yîn ve mahall-i mezkûreden hatab kat‘ ve Âsitâne’ye nakli ancak mezkûr altı ocağa münhasır olup bunlardan mâ‘adâ âhar kimesne men‘ ve def‘ ve korucu ma‘rifetiyle koru-yı hümâyûn muhâfaza olunmak bâbında tuğrâ-yı garrâ ile mu‘anven müceddeden bir kıt‘a emr-i âlîşân sudûru istid‘âsında oldukları huzûr-ı âlîlerine i‘lâm olundu. Fî 9 min Cumâde’l-ûlâ sene 1202.