İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 107 Hüküm no: 83 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kigork v. Petro’nun, Sayıcı Dimo v. Mihal’den olan koyun alacağından feragat ettiği Ma‘rûz Sâdır olan fermân-ı âlîlerine imtisâlen Bender civârında Tumbasar re‘âyâsından Kigork v. Petro nâm zimmî meclis-i şer‘-i münîrde arzuhâl edenlerden Sayıcı Dimo v. Mihal nâm zimmî muvâcehesinde takrîr-i kelâm edip mersûm Dimo zimmî hâlâ kasabbaşı ağa tarafından bâ-emr-i âlî fiy’at-ı mîrîye üzre muhtekir yedlerinde bulunan ağnâm mübâya‘asına sayıcı ta‘yîn olunup ve ben dahî muhtekir makûlesinden değil iken mersûm Dimo zimmî Âsitâne-i aliyye’ye tesyîr içün etrâfdan cem‘ eylediğim beheri yüzer pâre kıymetli yüz on dokuz re’s kebîr erkek ve doksanar pâre kıymetli yüz elli re’s marya ve seksenar pâre kıymetli yüz seksen re’s şişek cem‘an beş yüz seksen üç re’s ağnâmımı sen muhtekirsin deyü yedimden ahz ve İstanbul tarafına tesyîr ve semen-i ağnâm-ı mezkûru emr-i âlîde zikr olunduğu üzre iki yüz on akçe kart koyun ve yüz elli akçe marya ve yüz seksener akçe şişek içün cem‘an sekiz yüz elli üç guruş teslîm ederim al deyü bana aded teklîf edip lâkin ağnâm-ı mezkûrun bahâları ber-vech-i muharrer ziyâde olmağla mîrî fiy’atı üzerine zam ve semen-i misillerini tekmîl ile iktizâ eden ziyâdeyi mersûm Dimo zimmîden taleb ve da‘vâ eylediğimde ol dahî emr-i âlî mûcebince ta‘yin olunan fiy’at-ı mîrîye üzre mübâya‘asına me’mûr olmamla ağnâm mezkûreyi ahz ve kasabbaşı ağa tarafına teslîm eyledim deyü takrîrine muvâfık bir kıt‘a emr-i âlî ibrâzıyla nizâ‘a tasaddî eylediğinden bâ-vesâtat-ı muslıhîn ben ber-vech-i muharrer mîrî fiy’atından ziyâde müdde‘âmdan mersûm Dimo zimmî ile iki yüz guruşa ba‘de’s-sulh ve’l-kabûl ber-minvâl-i muharrer mîrî fiy’atı üzre olan semen-i mezkûr ile bedel-i sulh olan iki yüz guruşdan mâ‘adâ ziyâde müdde‘âma müte‘allika da‘vâdan mersûm Dimo zimmînin zimmetini ibrâ eylediğimde ol dahî [21b] kabûl eyledi dedikde mersûm Dimo zimmî dahî tasdîk ve bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 6 min Ca. sene 1202.