İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 108 Hüküm no: 84 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ahmed b. Mustafa ile Zeron v. Karabet’in değirmen hisselerini Haçok v. Talhak’a sattıkları Ma‘rûz İstanbul’da Eskiodalar kurbünde Çukurçeşme’de vâki‘ üç horoslu bir bâb uncu değirmeni derûnunda mevcûde beyne’l-hıref gedik ta‘bîr olunur on iki re’s bargir vesâ’ir âlât-ı lâzıme-i ma‘lûmenin rub‘ hissesine mutasarrıf olan el-Hâc Ahmed b. Mustafa ile sülüs-ı erbâ‘ hissesine mutasarrıf olan Zeron v. Karabet nâm zimmîden her biri meclis-i şer‘-i münîrde uncıyân esnâfının kethüdâları Mustafa Ağa ve mazbûtü’l-esâmî ustalar hâzırûn oldukları hâlde yine esnâf-ı mezbûreden Haçok v. Talhak nâm zimmî muvâcehesinde takrîr-i kelâm edip biz değirmen-i mezkûrda ber-vech-i muharrer ale’l-iştirâk mutasarrıf olduğumuz on iki re’s bargir ve âlât-ı sâ’ire-i ma‘lûmemizi dört bin guruşa mersûm Haçok zimmîye bâtten bey‘ ve temlîk ve teslîm eylediğimizde ol dahî ber-vech-i muharrer ba‘de’l-iştirâ ve’l-kabûl bizim cânib-i mîrîye senevî dört yüz elli guruş taksît ile dört bin guruş deynimiz olmağla semen-i mezkûrdan ber-vech-i muharrer senevî dört yüz elli guruş taksît ile deyn-i mezkûru cânib-i mîrîye edâ etmek üzre mersûm Haçok zimmîye emr eylediğimizde ol dahî ber minvâl-i muharrer taksît-i mezkûr ile deyn-i mezkûru edâya ta‘ahhüd ve iltizâm eyledi dediklerinde mersûm Haçok zimmî dahî tasdîk ve değirmen-i mezkûru edâya iktidârı olduğunu kethüdâ-yı merkûm ve mezbûrûn ustalar ihbâr etmeleriyle değirmen-i mezkûr gediği mersûm Haçok zimmî üzerine başmuhâsebeye kayd ve kayd-ı atîkine şerh birle ilm u haberi ve yedine sûret i‘tâ olunmak bâbında emr-i âlîşân sudûru istid‘âsında oldukları İstanbul Mahkemesi’nden huzûr-ı âlîlerine i‘lâm olundu. Fî 9 min Ca. sene 1202.