İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 109 Hüküm no: 85 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nişancı fırını ve değirmenin kiracılar tarafından tamir ettirilip ücretinin kira bedelinden ödendiği Ma‘rûz Sâdır olan fermân-ı âlîlerine imtisâlen İstanbul’da Kumkapı kurbünde vâki‘ Nişancı Fırını dimekle ma‘rûf bir bâb etmekçi fırını ve ittisâlinde bir bâb değirmenin beher şehr kırk yedişer buçuk guruş kirâ ile müste’cirleri olup arzuhâl eden Kirkor v. Kigork ve şerîki Kabril v. Haçok nâm zimmîler meclis-i şer‘-i kavîmde değirmen ve fırın-ı mezkûrların mutasarrıfesi Münteha Hânım bt. el-merhûm Abdurrahman Paşa tarafından husûs-ı âtîde vekîl olduğu zât-ı mûmâileyhâyı ârifân Mustafa Ağa b. Mehmed ve İbrahim b. Abdullah şehâdetleriyle sâbit olan zevci Mehmed Arif Ağa b. Abdülkadir Ağa muvâcehesinde her biri takrîr-i kelâm edip bin yüz doksan beş senesinde değirmen ve fırın-ı mezkûrlar ta‘mîre muhtâc oldukda merkûm Mehmed Arif Ağa zevcesi müvekkile-i mûmâileyhâ tarafından vekâleten değirmen ve fırın-ı mezkûrları siz ta‘mîr edin her ne harc ve sarf ederseniz ben size edâ ederim deyü bize emr etmekle biz dahî bi-şarti’r-rücû‘ emrine binâ’en değirmen ve fırın-ı mezkûrları ta‘mîr ve malımızdan sekiz yüz doksan [22a] dokuz guruşu harc ve sarf eylediğimizden sonra iki yüz seksen guruş ile dâyinimiz olan Yoseb zimmîyi mezbûr Mehmed Arif Ağa üzerine ba‘de’l-havâle ve’l-kabûl bâkî altı yüz on dokuz guruşu bize edâ etmek üzre yedimize temessük dahî i‘tâ etmekle meblağ-ı bâkî-i mezkûru mezbûr Mehmed Arif Ağa’dan taleb ve da‘vâ eylediğimizde ol dahî cevâbında meblağ-ı bâkî-i mezkûru dahî kirâ-yı mezkûrdan on yedi ayda on beşer guruşdan üç yüz kırk guruş ve üç aylık kirâ yüz yirmi guruş ki cem‘an dört yüz altmış guruşu takâs ile ve yüz elli guruşu dahî yedlerine teslîm ile edâ eyledim deyü nizâ‘a tasaddî eylediğinde bâ-vesâtat-ı muslıhîn biz da‘vâ-yı mezkûremizden vekîl-i merkûm ile üç yüz altmış guruşa sulh olduğumuzda ol dahî sulh-ı mezkûru kabûl edip biz ziyâde müdde‘âmıza ve vekîl-i mezbûrdan işbu sene-i mübâreke Rebî‘ü’l-âhiri gâyetine değin değirmen ve fırın-ı mezkûr kirâsına müte‘allika âmme-i da‘vâdan her birimiz asâleten ve vekâleten âharın zimmetini ibrâ ve iskât ve her birimiz âharın ibrâ-i mezkûrunu ba‘de’l-kabûl bedel-i sulh-ı mezkûr üç yüz altmış guruşu işbu Cumâde’l-ûlâ gurresinden yirmi dört ay tamâmına değin değirmen ve fırın-ı mezkûrun kirâlarının beher şehr on beşer guruşuna takâs ile edâya ta‘ahhüd eyledi dediklerinde vekîl-i merkûm Mehmed Arif Ağa dahî tasdîk edip bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 10 min Cumâde’l-ûlâ sene 1202.