İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 110 Hüküm no: 86 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kenar ipek bükücü esnafının kalfalarının işlerinin kolaylaştırılması ve ücretlerinin tam ödenmesi Ma‘rûz Sâdır olan fermân-ı âlîlerine imtisâlen Âsitâne-i aliyye’de kenar ipek bükücü esnâfının kalfalarından Süleyman Efendi ve Uzun Mehmed Emin ve Halil ve el-Hâc Derviş Ahmed ve Elişçibaşı Halil Ağa ve diğer Halil vesâ’ir mazbûtü’l-esâmî kalfalar meclis-i şer‘-i kavîmde esnâf-ı mezbûre kethüdâsı el-Hâc Mustafa ve Yiğitbaşı Yakub ve el-Hâc Ali ve Hasan ve Mustafa ve Ömer ve Osman vesâ’ir kezâlik mazbûtü’l-esâmî ustalar muvâcehelerinde her biri takrîr-i kelâm edip öteden beru mezbûrûn ustaların bizlere verdikleri dolab âlâtı muntazam ve çıkrıkları kebîr olmağla san‘atımızı i‘mâlde suhûlet vâr iken mezbûrûn ustalar dolabı sagîr ve âlâtı tağyîr etmeleriyle bizler san‘at-ı mezkûremizi meşakkat ve su‘ûbet ile i‘mâl edip bu vecihle umûrumuz muhtel olduğundan mâ‘adâ mezbûrûn ustalar ücretlerimizi dahî ketm etmeleriyle kadîmî üzre âlât-ı dolab ve çıkrığı tanzîm ve ücretlerimizi ketm etmemek üzre mezbûrûn ustalara tenbîh olunmak murâdımızdır deyü da‘vâ eylediğimizde mezbûrûn ustalar fîmâ ba‘d kadîmî üzre âlât-ı dolab ve çıkrıkları tanzîm edip ve yalnız sözünü ipek i‘mâlinde beher senede bizlere kırkar pâre ücret ve mâ‘adâ i‘mâl eylediklerimiz içün dahî kadîmden işbu târîh-i i‘lâma değin veregeldikleri misillü ücret i‘tâ etmek üzre ta‘ahhüd eylediklerinde biz dahî râzılar olmuşuzdur dediklerinde mezbûrûn ustalar dahî tasdîk edip bu vecihle bi’t-terâzî kat‘-ı münâza‘a eyledikleri huzûr-ı âlîlerine i‘lâm olundu. Fî 5 Ca. sene 1202.