İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 110 Hüküm no: 87 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazar, İstefan, Mığırdıç ve Ahram adlı ekmekçilerin devlete ve tüccara olan borçlarının diğer esnaf tarafından ödenip fırın ve değirmenlerin yeniden açılması Ma‘rûz Âsitâne-i aliyye’de ve tevâbi‘inde habbâzân esnâfının kethüdâları İsmail Ağa ve uncuyân kethüdâsı Mustafa Ağa ve ustalarından Okçularlı Ahmed Ağa ve Sofîlerli Kadri Ağa ve Bedrizâde Molla Mustafa ve es-Seyyid Ömer Ağa ve es-Seyyid Süleyman ve Mehmed ve Ali ile zimmî ustalarından Bedros ve Agob ve Bogos ve Kalboz ve Vartam ve Serkiz vesâ’ir mazbûtü’l-esâmî ustalar meclis-i şer‘-i münîrde yine esnâf-ı mezbûreden Kazar ve İstefan ve Mığırdıç ve Ahram nâm zimmîler [22b] hâzırûn oldukları hâlde her biri takrîr-i kelâm edip esnâfımızdan biri fırın ve değirmene mutasarrıf olup cânib-i mîrîye ve tüccâra olan deynini edâya kādir olmayıp veyâhûd edâ-i deyn etmeksizin firâr eder olur ise cümlemizin ma‘rifetiyle deyn-i mezkûru edâ ve değirmen ve fırını idâreye kādir kimesne iskân olunmak şurût-ı mer‘iyyemizden olmağla İstanbul’da Bahçekapısı hâricinde vâki‘ bir bâb etmekçi fırını ve ittisâlinde beşer horoslu bir bâb değirmen ile Hocapaşa’da kâ’in bir bâb etmekçi fırını ve ittisâlinde onar horoslu değirmen gedikleri altmışar sehm i‘tibârıyle beşer sehmi mesfûrûn Kazar ve İstefan ve Mığırdıç zimmîlerin ve beşer sehmi dahî Zakar ve Agob ve Bedros zimmîlerin on sehmi diğer Bedros zimmînin ve on iki sehmi dahî Avanes ve Agob’un ve Babek nâm karındaşların ve sekiz sehmi dahî Tomas zimmînin tasarruflarında olup senevî iki yüz guruşu taksît ile cânib-i mîrîye olan üç bin yedi yüz guruş deynleri ile tüccâra olan deynlerini edâ etmeksizin mesfûrân diğer Bedros ve Agob firâr ve gaybet ve mersûmân Zakar ve Bedros dahî hâlikân-ı mesfûrûn Tomas ve Avanes ve Agik ve Babek dahî müflis olmalarıyla mezkûr fırın ve değirmenler mesdûd kalıp memerr-i mahalde vâki‘ olduğu ecilden küşâdları ibâdullâha elzem ve küşâd olunmaları bâbında emr-i âlîşân sâdır olmağla bâlâda zikr olunduğu üzre beşer sehmine mutasarrıflar olan mesfûrûn Kazar ve İstefan ve Mığırdıç ile Ahram nâm zimmîler taksît-i mezkûru ve mâl-ı tüccârı edâ ve fırın ve değirmen-i mezkûrları idâreye kādir ve müte‘ahhidlerdir dediklerinde mesfûrûn dahi ba‘de’t-tasdîk değirmen ve fırın-ı mezkûrların gedikleri yine altmışar sehim i‘tibârıyla ber-vech-i muharrer cânib-i mîrîye olan deyn-i mezkûru senevî iki yüz guruşu taksît ile mâl-ı tüccârı dahi ceste ceste edâ etmek üzre on beşer sehmi mesfûrân Kazar ve İstefan zimmîler üzerlerine ve on sehmi dahî mersûm Mığırdıç ve yirmi sehmi mesfûr Ahram zimmî üzerlerine başmuhâsebeye kayd ve kayd-ı atîklerine şerh birle ilm u haberi ve yedlerine sûret i‘tâ olunmak bâbında emr-i âlîşân sudûru istid‘âsında oldukları İstanbul Mahkemesi’nden huzûr-ı âlîlerine i‘lâm olundu. Fî 9 Ca. sene 1202.