İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 111 Hüküm no: 88 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma-yı hümayun gemileri için beziryağı tedariki Ma‘rûz Sâdır olan fermân-ı âlîlerine imtisâlen işbu arzuhâl hâmişinde olan derkenârlara nazar olundukda Tersâne-i âmire’de Donanma-i hümâyûn kalyonlarının lâzımeleriçün mübâya‘a oluna gelen İstanbul’da vâki‘ bezirhâneler harîk-i kebîrde muhterik olup beherhâl âhar mahallerden tedârik ve mübâya‘aya muhtâc olmakdan nâşî lâzım gelen bahâları Tersâne-i âmire emîni tarafından ashâbına edâ olunmak şartıyla başmuhâsebeden muhrec sûret-i defter mûcebince Kartal ve Pendik ve Darıca ve Tavşancık ve Gekbûze ve Karye-i Aydınlı ve Kurd ve Gümüş ve Samandra ve Karye-i Kadı ve Şile ve nevâhî-i İznikmid ve Silivri ve Çatalca ve Çekmece kazâlarında vâki‘ otuz beş bâb bezirhânelerin her birinden yüz ellişer vakıyye revgan-ı bezîr Tersâne-i âmire emîni tarafından mübâya‘a ve Tersâne-i âmire’ye teslîm ettirilmek bâbında bin yüz doksan altı târîhinde bir kıt‘a emr-i âlî ve yine harîk-i kebîre binâ’en cebehâne ve Tersâne-i âmire levâzımıçün iktizâ eden revgan-ı bezîri idâre-i mer‘iyyedir deyü bezîrci esnâfının iltimâslarıyla si‘r-i râyici üzere iki yüz bir târihinde dahî âhar bir kıt‘a emr-i âlî sâdır olduğu derkenârlardan müstefâd olundukdan sonra Âsitâne-i aliyye ve tevâbi‘inde vâki‘ bezir yağcı esnâfından ashâb-ı arzuhâl kethüdâları Hüseyin Ağa ve Yazıcı Molla Salih ve Yiğitbaşı Ahmed ve Mehmed ve diğer Ahmed ve Molla Ali ve Hasan nâm ustalar ile zimmî ustalarından Vasil ve Marat ve Agob ve İstavri ve Mikayil ve Oseb ve Atili ve Kalender ve Tanaş nâm zimmîlerden her biri meclis-i şer‘-i kavîmde takrîr-i kelâm edip fi’l-asl Âsitâne-i aliyye ve tevâbi‘inde altmış dört bâb bezîrhane olup ba‘de’l-harîk kırk altı bâb bezîrhâneye iblâğ olunup mâ‘adâ on sekiz bâb bezîrhâneler mu‘attal kaldığından mâ‘adâ sefer-i hümâyûn-ı nusret-makrûn takrîbiyle cebehâne ve Tersâne-i âmire ve kılâ‘ın revgan-ı bezîr levâzımı tezâyüd etmeğin tekmîlen edâ ve idâre yine her vecihle tahammül ve tâkatimiz kalmayıp beher hâl ber-vech-i âtî mübâya‘aya eşedd-i ihtiyâc ile muhtâc olmağla doksan altı senesinde Tersâne-i âmire emîni tarafından ber-vech-i muharrer mübâya‘a olunduğu misillü yine Tersâne-i âmire emîni tarafından mezkûr kazâlarda vâki‘ otuz beş bâb bezîrhânelerin her birinden yüz ellişer [23a] vakıyye revgan-ı bezîr mübâya‘a olunmak bâbında bir kıt‘a emr-i âlîşân sudûru istid‘âsında oldukları huzûr-ı âlîlerine i‘lâm olundu. Fî 13 Ca. sene 1202.