İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 112 Hüküm no: 89 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İshak b. Süleyman’ın kasap dükkanı gedik hisse ve aletlerini Duka ve Dimitri’ye sattığı Ma‘rûz Evkâf-ı hazret-i şehriyârîden Dokuzuncu Selhhâne’ye merbût olup medîne-i Üsküdar’a muzâfa Anadolu Hisârı’nda vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin bâ-temessük mutasarrıfı İshak b. Süleyman nâm kimesne meclis-i şer‘-i kavîmde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa hâzır olduğu hâlde husûs-ı âtîde kendiden asîl ve Duka v. Çano tarafından tasdîka vekîl-i şer‘îsi Dimitri v. Harito zimmî muvâcehesinde takrîr-i kelâm edip ber-vech-i muharrer mutasarrıf olduğum âlât-ı mezkûrenin nısf hisse-i şâyi‘asını hüsn-ı rızâ ve ihtiyârımla zimmiyân-ı mersûmâna ale’l-iştirâki’s-sevî bedel-i ma‘lûm mukâbelesinde bâ-re’y-i mütevellî ferâgat ve kasr-ı yed eylediğimde anlar dahî ber-vech-i muharrer tefevvüz ve kabûl edip fîmâ ba‘d âlât-ı mezkûrenin nısfı benim tasarrufumda nısf-ı âharı dahî mersûmân Duka ve Dimitri zimmîlerin hakk-ı mufavvazları olmuşdur dedikde mersûm Dimitri zimmî asâleten ve vekâleten ba‘de’t-tasdîk âlât-ı mezkûrenin nısfı mezbûr İshak ferâğından ale’l-iştirâki’s-sevî zimmîyân-ı mersûmân üzerlerine defter-i vakfa kayd ve nısf hissesiçün atîk temessük fâriğ-i mezbûr İshak yedinde ibkâ ve zimmiyân-ı mersûmân yedlerine müceddeden temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî 16 Ca. sene 1202.