İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 113 Hüküm no: 90 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın evine zararı olan Manav Ahmed Beşe’nin evinin üzerindeki baca, tahta örtü ve pencerenin kaldırılması Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel Başkâtib Ahmed Efendi hâssa mi‘mârı hülefâsından el-Hâc Ahmed ve Mustafa Halîfeler ile İstanbul’da Kumkapı kurbünde Tavâşî Süleyman Ağa mahallesinde vâki‘ sâhib-i arzuhâl Mehmed Ağa b. Ali’nin menziline varıp huzûr-ı Müslimînde ba‘de akdi’l-meclis mezbûr Mehmed Ağa meclis-i ma‘kûd-ı mezkûrda menzil-i mezkûr ittisâlinde merhûm Tavâşî Süleyman Ağa Vakfı müsekkafâtından bir bâb menzile mutasarrıf olan derûn-ı arzuhâlde mezkûrü’l-ism Manav Ahmed Beşe b. Ebâbekir muvâcehesinde vakf-ı mezbûrun kâ’immakâm-ı mütevellîsi İmâm Hafız Yahya Efendi hâzır olduğu hâlde mezbûr Ahmed Beşe menzili sakfı üzerine bâ-fermân-ı âlî memnû‘âtdan olan tûlen iki ve arzen bir ve kadden iki zirâ‘ bir aded bozacı bacası ile tûlen üç buçuk ve arzen iki buçuk zirâ‘ bir aded tahta pûş binâ ve ihdâs eylediğinden mâ‘adâ menzilin döşemesi tahtından müceddeden bir aded sagîr pencere küşâd etmekle mârrü’z-zikr tahta pûşdan ve pencereden benim menzilimin makarr-ı nisvân olan mahallerine nezâret ve zarar-ı bînî olmağla men‘ ve ref‘ olunmak matlûbumdur deyü da‘vâ eyledikde mezbûr Ahmed Beşe dahî zikr olunan baca ve tahta pûş ve pencerenin hüdûsunu ikrâr ve i‘tirâf etmekle mi‘mârân-ı mezbûrân Müslimûn-ı hâzırûn ile ba‘de’l-keşf ve’l-mu‘âyene fi’l-hakîkâ mezbûr Ahmed Beşe’nin müceddeden binâ eylediği tahta pûş ve pencereden müdde‘î-i mezbûrun menzilinin makarr-ı nisvân olan mahallerine nezâret ve zarar-ı bîni olup ve mârrü’z-zikr baca ve tahta pûş hilâf-ı fermân-ı âlî olmağla bâ-fermân-ı âlî kal‘ ve ref‘ olunur makûleden olduğunu ve zikr olunan pencerenin dolma duvarı seddiyle nezâret ve zararı mündefi‘ olur deyü ba‘de’l-ihbâr zikr olunan pencereyi dolma duvar ile sed ve bende mezbûr Ahmed Beşe’ye mahallinde ba‘de’t-tenbîh mârrü’z-zikr baca ve tahta pûşun kal‘ ve ref‘i içün fermân-ı âlîleri sudûrunu istid‘â eylediğini kâtib-i mezbûr mahallinde ba‘de’t-tahrîr ümenâ’-i şer‘le meclis-i şer‘a inhâ eylediği İstanbul Mahkemesi’nden huzûr-ı âlîlerine i‘lâm olundu. Fî 19 min Ca. sene 1202.