İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 114 Hüküm no: 91 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki b. Abdülkerim’in, balgami taş imameci esnafından Marat ve Bünyad’a açtığı a‘şar vergisi davasının reddolunduğu Ma‘rûz Sâdır olan fermân-ı âlîlerine imtisâlen sâhib-i arzuhâl Abdülbaki b. Abdülkerim nâm kimesne meclis-i şer‘-i münîrde İstanbul’da balgamî taş imâmeci esnâfından Bünyad v. Yovan ve Marat v. Abram nâm zimmîler muvâcehelerinde takrîr-i kelâm edip esnâf-ı mezbûrenin imâme i‘mâl eyledikleri balgamî taş benim bâ-berât-ı âlî mutasarrıf olduğum timârım arâzîsinden Tokat sancağında Elise karyesinden ihrâç olunmağla iktizâ eden a‘şârı balgamî taş mukâta‘asının mâlikâne mutasarrıfları tarafından sâhib-i arza verilmek şartıyla mukayyed olup mesfûrân Marat ve Bünyad zimmîler dahi on beş ay mukaddem taraflarından adamları olan gâ’ib ani’l-beled Yoseb ve Mihal nâm zimmîleri karye-i mezbûreye irsâl anlar dahî karye-i mezbûrdan yüz elli kantâr balgamî taş ihrâç ve İstanbul’da mesfûrân Marat ve Bünyad’a vâsıl olmak üzre irsâl edip İstanbul’a geldikde işbu yedimde olan gümrük defteri derkenârı nâtık olduğu üzre nısf mâlikâne mutasarrıfı Zıhgîrî Abdullah Ağa resm-i gümrük i‘tâ ve ahcâr-ı mezkûreyi kendi malı olmak üzere zabt ve esnâf-ı mezbûreye ma‘rifet-i şer‘le bey‘ edip lâkin ahcâr-ı mezkûreyi ihrâc ve İstanbul’a irsâl eden mersûmân Yoseb ve Mihal mücerred mesfûrân Marat ve Bünyad zimmîlerin adamları olmağla iktizâ eden a‘şârını bana edâya mesfûrâna tenbîh olunmak murâdımdır deyü mesfûrân Marat ve Bünyad zimmîlerden da‘vâsı meşrû‘a ve mu‘tebere olmamağla müdde‘î-i mezbûr Abdülbaki bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 21 min Cumâde’l-ûlâ sene 1202.