İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 114 Hüküm no: 92 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muytab esnafının alatcı esnafından imdadiye tahsil edilmesi taleplerinin reddolunduğu Ma‘rûz Sâdır olan fermân-ı âlîlerine imtisâlen ashâb-ı arzuhâl İstanbul’da Çarşı ve Atbazarı’nda muytab esnâfının kethüdâları es-Seyyid Mehmed Sadık ve el-Hâc Ahmed ve Yiğitbaşı Ömer ve ustalarından es-Seyyid Mehmed Emin ve Molla Halil nâm kimesneler meclis-i şer‘-i kavîmde âlâtcılar esnâfının kethüdâsı el-Hâc Ali ve Yiğtibaşı Mehmed Emin ve el-Hâc Yakub ve el-Hâc Süleyman ve diğer el-Hâc Ali ve âhar el-Hâc Ali nâm kimesneler muvâcehelerinde takrîr-i kelâm edip öteden beru sefer-i hümâyûn vukû‘unda dört aded hayme ile ordu ihrâcı içün bize yamak ta‘yîn olunan keçeci ve kârhâne ipçileri ve urgancılar ve âlâtcılar esnâfı imdâdiyelerini veregelmişler iken âlâtcılar esnâfı işbu sene-i mübârekede iktizâ eden imdâdiyelerini edâda muhâlefet etmeleriyle suâl olunup alıverilmesi murâdımızdır dediklerinde mezbûr âlâtçı esnâfı cevâblarında biz öteden beru umûriyeye edâ edegelmemizle ber-vech-i muharrer muytab esnâfına yamak olmayıp ve bu âna değin sefer-i hümâyûn vukû‘unda muytab esnâfına imdâdiye nâmıyla bir akçe ve bir habbe verdiğimiz yokdur deyü külliyen inkâr etmeleriyle mezbûrûn muytab esnâfından ber-minvâl-i muharrer sıdk-ı mekâllerine beyyine taleb olundukda ityân-ı beyyineye kādirler olmayıp ve hâmiş-i arzuhâlde olan mevkûfât derkenârında muytab esnâfının yamakları bâlâda mezkûr keçeci ve kârhâne ipcileri ve urgancılara münhasır ve âlâtçılarımız mezkûr olup ve teşrîfât derkenârında dahî bedellerinin mikdârı beyân olmaksızın mârrü’z-zikr dört aded esnâf muytâb esnâfına yalnız yamak olmak üzere mastûr olup bu vecihle iki derkenâr birbirine muğâyir olduğundan mâ‘adâ sicillâtdan dahî tetebbu‘ olundukda ber-vech-i muharrer âlâtçıların yamak olduklarını müş‘ir bir kayd dahî bulunmamağla da‘vâ-yı [24a] mezkûrelerine şer‘an faysal verilmeyip tarafeynden her biri husûs-ı mezkûrda re’y-i âlîlerine râzılar oldukları huzûr-ı âlîlerine i‘lâm olundu. Fî 28 min Ca. sene 1202.