İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 115 Hüküm no: 93 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Ahmed’in, Hüseyin b. Hüseyin’den aldığı çorbacı dükkanı kira bedelini kiraya vermemesi sebebiyle geri ödemesi Ma‘rûz İstanbul’da çörekçi esnâfından olup İskilib Hânı kurbünde vâki‘ bir bâb çorbacı dükkânı gediği dört sehim i‘tibârıyla iki buçuk sehmine mutasarrıf olan Hüseyin b. Hüseyin nâm kimesne meclis-i şer‘-i kavîmde gedik-i mezkûrun bir buçuk sehmine mutasarrıf olan ma‘rifetü’z-zât Saliha bt. Ahmed nâm hatun muvâcehesinde takrîr-i kelâm edip mezbûre Saliha Hatun gedik-i mezkûreden mutasarrıfe olduğu bir buçuk sehmini işbu sene-i mübâreke Muharrem’i gurresinden iki sene tamâmına değin dört yüz guruşa bana îcâr ve şâyi‘an teslîm ve meblağ-ı mezkûru yedimden tamâmen ahz u kabz edip ben dahî ber-vech-i muharrer istîcâr ve kabûl ve tesellüm etmişiken meblağ-ı mezkûru karz-ı şer‘î olmak üzere ahz u kabz etmişidim deyü kabzını ikrâr ve ber-vech-i muharrer bana îcârını inkâr ettikde ben dahî müdde‘âmı beyâna kādir olmayıp ve mezbûre dahî bi’t-taleb yemîn etmeğin ikrârı mûcibince yedimden makbûzu olan dört yüz guruşu mezbûreden taleb ederim deyü ba‘de’d-da‘vâ ve’s-suâl ve’l-ikrâr alâ mûcib-i ikrârihâ meblağ-ı mezkûr dört yüz guruşu müdde‘î-i mezbûr Hüseyin’e edâ ve teslîme mezbûre Saliha Hatun’a şer‘an tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 2 C. sene 1202.