İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 116 Hüküm no: 94 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsa Beşe b. Süleyman’ın kiracısı olduğu Çiftehamam’ı tamir ettirdiğinden hamam sahiplerine açtığı tamir bedeli davasında haksız olduğu Ma‘rûz Sâdır olan fermân-ı âlîlerine imtisâlen sâhib-i arzuhâl İsa Beşe b. Süleyman nâm kimesne Çarşamba günü dîvân-ı âlîlerinde ba‘dehû du‘âhânemizde ma‘kûd meclis-i şer‘-i kavîmde Üsküdar’a muzâfa Anadolu Hisârı’nda vâki‘ Çiftehamâm beş sehim i‘tibârıyla bir sehmine mutasarrıf olup husûs-ı âtîde kendi nefsinden asîl ve üç sehmine mutasarrıfe olup bir sehmine mutasarrıf olan Sagîr Mehmed Sa‘id b. Abdullah’ın vasîsi Saliha Hatun bt. Mehmed Emin Efendi tarafından vekîl olduğu zâtını ârifân Ali b. Emrullah ve Mehmed Emin b. Mehmed Efendi b. Hamza şehâdetleriyle sâbit olan zevci el-Hâc Ahmed Necib Efendi b. el-Hâc Osman muvâcehesinde takrîr-i kelâm edip ben hamâm-ı mezkûrda mezbûrân taraflarından beher şehr yirmişer guruş kirâ ile müste’cirleri olup doksan dört senesinde zevcân-ı mezbûrânın bi-şarti’r-rücû‘ emirlerine binâ’en hamâm ta‘mîrâtına mâlımdan harc u sarf eylediğim sekiz yüz elli iki guruşu mezbûrândan taleb ederim deyü ba‘de’d-da‘vâ ve’l-istintâk mezbûr el-Hâc Ahmed Necib Efendi cevâbında ber-vech-i muharrer emirlerini ve müdde‘î-i mezbûrun ta‘mîr ve sarfını inkârından mâ‘adâ iki yüz bir senesi Şa‘bân’ı gurresinde ben müdde‘î-i mezbûrdan zimmetinde müctemi‘ yüz yirmi guruş kirâyı taleb ve da‘vâ eylediğimde ol dahî hamâm-ı mezkûra sarf eyledim deyü meblağ-ı mezkûru benden da‘vâya tasaddî ile beynimizde ba‘de’l-münâza‘a bâ-vesâtat-ı muslıhîn her birimiz da‘vâ-yı mezkûremizden fâriğler olup ben bi’l-asâle ve bi’l-vekâle müdde‘âm olan yüz yirmi guruşa müte‘allika âmme-i dâ‘vâdan müdde‘î-i mezbûr İsa Beşe’nin zimmetini ibrâ ve iskāt ol dahî ber-vech-i muharrer müdde‘âsı olan hamâm ta‘mîrâtı mesârifine müte‘âllika âmme-i da‘vâdan benim ve müvekkilem mezbûrenin ve sagîr-i mezbûrun zimmetlerini ibrâ’-i âm ile ibrâ ve iskât edip her birimiz âharın ibrâsını kabûl eyledik deyü ba‘de’d-def‘ ve’s-suâl ve’l-inkâr dâfi‘-i mezbûr el-Hâc Ahmed Necib Efendi def‘-i mezkûrunu lede’t-tezkiye adâletleri zâhir olan hamâmcılar yiğitbaşısı es-Seyyid Mehmed Sadık Ağa b. es-Seyyid el-Hâc Ahmed ve es-Seyyid Abdullah Ağa b. es-Seyyid Ömer nâm kimesne şehâdetleriyle müdde‘î-i mezbûr muvâcehesinde vech-i şer‘î üzere isbât etmeğin mûcebiyle müdde‘î-i mezbûr İsa Beşe mu‘ârazadan men‘ olunduğu huzûr-ı âlîlerine i‘lâm olundu. Fî 29 Ca. sene 1202.