İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 117 Hüküm no: 95 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in babasından intikal eden kasap gedik hisse ve aletlerini es-Seyyid Ahmed ve es-Seyyid İbrahim’e sattığı Ma‘rûz Sâhibe-i arzuhâl ma‘rifetü’z-zât Rukiye bt. Mehmed nâm hatûn meclis-i şer‘-i kavîmde evkâf-ı hazret-i şehriyârî mütevellîsi tarafından vekîli kassâblar kethüdâsı el-Hâc Ali Ağa hâzır olduğu hâlde Evkâf-ı hümâyûn’dan Dokuzuncu Selhhâne’ye merbût olup medîne-i Üsküdar’a muzâfa Kadı karyesinde vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin bâ-temessük-ı mütevellî ale’l-iştirâk mutasarrıfları es-Seyyid Ahmed b. Veliyyüddin ve es-Seyyid İbrahim b. Mustafa taraflarından tasdîka vekîl-i şer‘îleri İsmail b. Ahmed muvâcehesinde takrîr-i kelâm edip âlât-ı mezkûre babam mezbûr Mehmed b. Ahmed’in tasarrufunda iken doksan iki senesinde fevt oldukda âlât-ı mezkûre hasbe’l-âde bana intikâl etmişiken bilâ veled fevt oldu deyü cânib-i vakfdan vekîl-i mezbûr İsmail’e ba‘de’l-îcâr ol dahî bâ-re’-yi mütevellî müvekkilân-ı mezbûrân es-Seyyid Ahmed ve es-Seyyid İbrahim’e ale’l-iştirâk ferâğ ve tefvîz anlar dahî tefevvüz ve kabûl ve âlât-ı mezkûreyi zabt ederler suâl olunup âlât-ı mezkûreden keff-i yed ve babamdan intikâl etmek üzre bana teslîme tenbîh olunmak murâdımdır deyü tasaddî eylediğim da‘vâmdan bâ-vesâtat-ı muslıhîn müvekkilân-ı mezbûrân ile iki yüz guruş bedel-i makbûza ba‘de’s-sulh ve’l-kabûl âlât-ı mezkûreye müte‘allika âmme-i da‘vâdan mezbûrânın zimmetlerini ibrâ’-i âm ile ibrâ’ ve iskāt eylediğimde anlar dahî ibrâ’-i mezkûrumu kabûl eylediler dedikde vekîl-i mezbûr dahi tasdîk edip bu vecihle kat‘-ı münâza‘a eyledikleri huzûr-ı âlîlerine i‘lâm olundu. Fî 3 min C. sene 1202.