İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 117 Hüküm no: 96 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’in yağcı dükkanının 60 sehmini borcundan dolayı Ümmügülsüm Hatun’a sattığı ancak daha sonra aynı hisseyi Hüseyin’e sattığı Ma‘rûz İstanbul’da yağcı esnâfından Ahmed b. Mehmed nâm kimesne meclis-i şer‘-i kavîmde yine esnâf-ı mezbûreden takrîr-i kelâm edip İstanbul’da Kapan-ı Asel Çarşısı’nda vâki‘ Emir Hüseyin Dükkânı dimekle ma‘rûf bir bâb yağcı dükkânı derûnunda mevcûde beyne’l-hıref gedik ta‘bîr olunur alât-ı lâzıme-i ma‘lûme yüz yirmi sehm i‘tibârıyla altmış sehmi bundan akdem benim mülk ve tasarrufumda iken nısf âlât-ı mezkûremi Ümmügülsüm bt. Abdülgani Efendi nâm hatuna bin guruş deynim mukâbelesinde bey‘ ve temlîk eylediğimden sonra nısf âlât-ı mezkûreyi kable’t-teslîm mezbûre Ümmügülsüm Hatun’un izin ve icâzetiyle işbu Cumâde’l-âhire gurresinde nısf âlât-ı mezkûreyi kendi mülkümdür deyü bâ-hüccet-i şer‘iyye mezbûr Hüseyin’e bin guruşa bey‘ ve temlîk ve teslim eylediğimde ol dahî ber-vech-i muharrer iştirâ ve temellük ve tesellüm ve kabûl eyledikden sonra ben mebî‘-i mezkûrun tagrîr ve gabnına ve bi’l-cümle gedik-i mezkûra müte‘allika âmme-i da‘vâdan mezbûr Hüseyin’in zimmetini ibrâ’-i âm ile ibrâ’ ve iskāt edip ol dahî ibrâ’-i mezkûrumu ba‘de’l-kabûl mezbûre Ümmügülsüm Hatun ber-vech-i muharrer izn ve icâzetine [25a] nâdime olup üç gün mürûrunda âlât-ı mezkûrenin nısfı olan altmış sehmin yirmi sehmini semen-i ma‘lûme bana bey‘ ve temlîk etmekle nısf âlât-ı mezkûrenin yirmi sehmini ben zabt ederim deyü tasaddî eylediği da‘vâsı meşrû‘a ve mu‘tebere olmamağla da‘vâ-yı mezkûresine iltifât olunmayıp bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 4 min C. sene 1202.