İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 118 Hüküm no: 97 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eflak ve Tuna’dan koyun toplanıp İstanbul’a gönderilmesinde görevli celeplere karışılmaması Ma‘rûz Hâlâ Âsitâne-i aliyye’de kasabbaşı izzetlü Mehmed Emin Ağa tarafından vekîli kasab esnâfının kethüdâsı el-Hâc Ali Ağa ve ustalarından el-Hâc Mahmud ve el-Hâc Osman ve İsmail ve diğer İsmail ve Ahmed ve es-Seyyid Mehmed ve Mehmed Emin vesâ’ir mazbûtü’l-esâmî kasab ustaları meclis-i şer‘-i kavîmde arzuhâl eden işbu hâzırûn bi’l-meclis Teton celeblerinden Keriço ve Esvatko ve Riko ve Nikola ve Dimo ve Kanço ve Karaçon oğlu Riko ve İskenderli Suyolcu Petri ve Ivazköylü Antonaki ve Todoraki ve Yovan ve Avretalanlı Rado ve İstamin ve Aci Estani ve Simaven ve Ziştolu Aci Hristo nâm zimmîler öteden beru Eflâk cânibinden mallarıyla külliyetlü ağnâm iştirâ ve Âsitâne-i aliyye’ye nakl ve tesyîr eder mu‘temed celebândan olup ve Âsitâne-i aliyye sekenesi dahî celebân-ı mesfûrûnun ber-vech-i muharrer ağnâm sevk ve tesyîrlerine muhtâc ve işbu sene-i mübârekede Eflak vesâ’ir mahallerde tecemmü‘-ı asâkir olmağla esfâr-ı sâbıkada olduğu gibi celebân-ı mesfûrûnun vesâ’ir celeblerin Âsitâne’ye tesyîr içün mahâll-i mezkûrede ashâbının rızâlarıyla ağnâm iştirâ ve cem‘lerine ve Tuna’dan vesâ’ir mahallerden imrâr ve Âsitâne’ye sevk ve tesyîrlerine kat‘â müdâhale ve mumâna‘at olunmamak üzre emr-i âlî sudûruna muhtâcdır deyü her biri ihbâr ve celebân-ı mesfûrûn dahî sinîn-i sâbıka misillü külliyetlü ağnâm iştirâ ve Âsitâne-i aliyye’ye sevk ve tesyîr etmek üzre her biri ta‘ahhüd ve birbirlerine tekeffül etmeleriyle ber-vech-i meşrûh mahall-i mezkûra ve Âsitâne’ye gelince yol üzerinde olan kazâların hükkâm ve zâbitânına hitâben tuğrâ-yı garrâ ile mu‘anven bir kıt‘a mü’ekked emr-i âlîşân sudûru bâbında istid‘â-yı inâyet eyledikleri huzûr-ı âlîlerine i‘lâm olundu. Fî 7 min C. sene 1202.