İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 119 Hüküm no: 98 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen İsmail Usta’nın kasap dükkanı gedik hissesinin oğulları tarafından es-Seyyid Mehmed’e satıldığı Ma‘rûz Evkâf-ı hazret-i şehriyârîden Yedinci Selhhâne’ye merbût olup İstanbul’da Acemoğlanı Meydanı kurbünde dört yol ağzında vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin iki kıt‘a mütevellî temessüküyle mutasarrıfı olup bundan akdem vefât eden İsmail Usta b. Mehmed’in sulbî kebîr oğulları Ahmed ve Mehmed nâm kimesneler meclis-i şer‘-i kavîmde hâlâ Kasabbaşı Mehmed Emin Ağa tarafından vekîli kasablar kethüdâsı el-Hâc Ali Ağa ve ustalarından el-Hâc Osman ve es-Seyyid el-Hâc Mahmud hâzırûn oldukları hâlde yine kasab ustalarından [25b] es-Seyyid Mehmed b. Ali muvâcehesinde her biri takrîr-i kelâm edip biz babamız müteveffâ-yı mezbûrdan intikâl eden mârrü’z-zikr âlât-ı lâzıme-i ma‘lû[me]nin nısfını tasarrufumuzda ibkâ ve nısf-ı âharını dahî hüsn-ı rızâ ve ihtiyârımız ile bedel-i ma‘lûm mukâbelesinde bâ-re’y-i mütevellî mezbûr es-Seyyid Mehmed’e ferâgat ve kasr-ı yed edip fîmâ ba‘d âlât-ı mezkûrenin nısfı bizim ve nısf-ı âharı mezbûr es-Seyyid Mehmed’in hakk-ı mufavvazı olmuşdur dediklerinde mezbûr es-Seyyid Mehmed dahî ba‘de’t-tasdîk âlât-ı mezkûrenin nısf-ı şâyi‘i mezburân Ahmed ve Mehmed’in ferâğ ve kasr-ı yedlerinden mezbûr es-Seyyid Mehmed üzerine tahrîr ve defter-i vakfa kayd birle yedine temessük i‘tâ olunmak ricâsında oldukları İstanbul Mahkemesi’nden huzûr-ı âlîlerine i‘lâm olundu. Fî 6 Cumâde’l-âhire sene 1202.