İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 120 Hüküm no: 100 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayim v. Avram’ın evinin bitişiğinde oturan Hayim’in evinin içindeki taş duvarı yıkıp mutfak inşa edip pencere açmasıyla eve zarar verdiği, bundan dolayı evin tekrar eski haline getirilmesi Ma‘rûz Sâdır olan fermân-ı âlîlerine imtisâlen kıbel-i şer‘den mürsel Kâtib Merhabâzâde Mahmud Efendi hâssa mi‘mârlarından İsmail ve Mehmed Arif Halîfeler ve izzetlü sekbanbaşı ağa tarafından ta‘yîn olunan Yazıcı Miyâne Ahmed Efendi ile İstanbul’da Cibalikapısı hâricinde Seferikoz mahallesinde Tüfenkhâne civârında vâki‘ Kasımpaşa Vakfı’ndan Hayim Yahudi’nin mutasarrıf olduğu Yahûdîhâne’ye varıp huzûr-ı Müslimînde ba‘de akdi’l-meclis derûn-ı arzuhâlde mastûrü’l-ism mersûm Hayim v. Avram Yahûdî meclis-i ma‘kûd-ı mezkûrda vakf-ı mezbûr mütevellîsi tarafından vekîl-i şer‘îsi es-Seyyid Hasan hâzır olduğu hâlde ittisâlinde vâki‘ bir bâb Yahûdîhâne’ye mutasarrıf olan hâlâ dergâh-ı âlî yeniçerileri ocağı bâzirgânı Celbun nâm-ı diğer Yemton v. Menayil Yahûdî tarafından husûs-ı âti’l-beyânda vekîl olduğu es-Seyyid Ahmed b. Abdullah ve Halil b. Mustafa şehâdetleriyle sâbit olan Abdülkerim Efendi b. Ömer mahzarında müvekkil-i mesfûr benim mutasarrıf olduğum Yahûdîhâne’mde [26a] kâ’in taş odanın duvarını kendi tarafından hedm ve derûnuna fuzûlî matbah ocağı binâ ve ihdâs ve fevkânî odasında ihdâs eylediği iki aded pencerelerinden benim menzilimin makarr-ı nivsân olan mevâzi‘ine nezâret ve zarar-ı bînî olmağla ihdâs eylediği ocak-ı mezkûr ref‘ ve iki aded pencere-i mezkûre dahî sedd u bend olunmak matlûbumdur deyü da‘vâ eyledikde mevlânâ-yı mezbûr ve mi‘mârân-ı mezbûrân cemâ‘at-i Müslimîn ile nazar eylediklerinde zikr olunan taş odanın duvarını hedm ile derûnuna ocak ihdâs olunup ve mezkûr odanın dahî ihdâs olunan iki aded pencerelerinden müdde‘î-i mesfûrun menzilinin makarr-ı nisvân olan mahallerine nezâret ve zarar-ı bînî bi’l-mu‘âyene zâhir oldukdan sonra bâ-tavassut-ı muslıhîn müdde‘î-i mesfûr zikr olunan ocak tûlen iki zirâ‘ ve arzen nısf zirâ‘ mahall-i mesfûr Hayim Yahûdî’nin tasarrufunda olup duvar-ı mezkûr münhedim oluncaya değin isti‘mâl et[me]mek üzre bâ-re’y-i mütevellî müvekkil-i mersûma ba‘de’l-izn ber-vech-i muharrer müvekkil-i mesfûr ihdâs eylediği iki aded pencerelerini sedd u bend etmek üzere vekîl-i merkûm Abdülkerim Efendi’ye tenbîh eylediğini mevlânâ-yı mezbûr mahallinde ketb u tahrîr ve ma‘an mürsel ümenâ’-i şer‘le meclis-i şer‘a gelip inhâ ve takrîr eyledikleri huzûr-ı âlîlerine i‘lâm olundu. Fî 12 min C. sene 1202.