İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 121 Hüküm no: 101 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mansur’un kasap dükkanı gediği hisse ve aletlerini Süleyman Beşe b. Ebabekir’e sattığı Ma‘rûz Evkâf-ı hazret-i şehriyârîden İkinci Selhhâne’ye merbût olup İstanbul’da Küçükmustafapaşa Çarşısı’nda üç yol ağzında doğramacı dükkânı ittisâlinde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin bâ-temessük-ı mütevellî mutasarrıfı Ali Beşe b. Mansur nâm kimesne meclis-i şer‘-i münîrde hâlâ kasabbaşı tarafından vekîli kasablar kethüdâsı el-Hâc Ali Ağa hâzır olduğu hâlde yine kasab ustalarından Süleyman Beşe b. Ebabekir muvâcehesinde takrîr-i kelâm edip ber-vech-i muharrrer mutasarrıf olduğum âlât-ı lâzıme-i ma‘lûmemi hüsn-ı rızâ ve ihtiyârımla bedel-i ma‘lûm mukâbelesinde bâ-re’y-i mütevellî mezbûr Süleyman Beşe’ye ferâgat ve kasr-ı yed edip fîmâ ba‘d âlât-ı mezkûrede benim kat‘â alâka ve medhalim kalmayıp mezbûr Süleyman Beşe’nin hakk-ı mufavvazı olmuşdur dedikde mezbûr Süleyman Beşe dahî ba‘de’t-tasdîk âlât-ı mezkûre merkûm Ali Beşe’nin ferâğ ve kasr-ı yedinden mezbûr Süleyman Beşe üzerine tahrîr ve defter-i vakfa kayd birle yedine temessük i‘tâ olunmak ricâsında oldukları huzûr-ı âlîlerine i‘lâm olundu. Fî 12 min C. sene 1202.