İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 124 Hüküm no: 107 Orijinal metin no: [27a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tabib Kabril v. Salman’ın tabib dükkanı kira borcunu mülk sahiplerine ödemesi Ma‘rûz İstanbul’da Dikilitaş kurbünde Vâlide Hamâmı sırasında vâki‘ bir bâb tabîb dükkânı altmışar sehm i‘tibârıyla yedi buçuk sehmine mutasarrıf olup husûs-ı âtîde kendi nefsine asîl ve yedişer buçuk sehimlerine mutasarrıfân li-ebeveyn karındaşları Mustafa ve Fatma Hatun ibney el-Hâc Süleyman taraflarından vekîl olduğu zât-ı mezbûreyi ârifân el-Hâc İbrahim b. İsmail ve es-Seyyid Ahmed b. Osman şehâdetleriyle sâbit olan Hâfız Mehmed Efendi b. el-mezbûr el-Hâc Süleyman ile kezâlik yedi buçuk sehmine mutasarrıf İbrahim Bey b. İsmail ve on beş sehmine mutasarrıfe vâlidesi Esbere Hatun bt. Abdullah taraflarından kezâlik husûs-ı âtîde vekîl olduğu zâtını ârifân mezbûr es-Seyyid Ahmed ve Bostânî Hasan b. Osman şehâdetleriyle sâbit olan el-Hâc Mehmed Ağa b. Hüseyin’den her biri meclis-i şer‘-i kavîmde dükkân-ı mezkûrda [27b] mütemekkin Tabîb Kabril v. Salman zimmî ile terâfu‘larında mesfûr Kabril zimmî dükkân-ı mezkûrda beher şehr on birer guruş birer rub‘ kirâ ile müşâhereten müste’cirimiz olup bin iki yüz senesi Cumâde’l-âhiresi gâyetine değin zimmetinde müctemi‘ yirmi beş aylık iki yüz seksen bir guruş birer rub‘ kirâ on sihâm-ı mezkûreye isâbet eden iki yüz on buçuk guruş on yedi pâreyi mersûm Kabril zimmîden bi’l-asâle ve bi’l-vekâle taleb ederiz deyü ba‘de’d-da‘vâ ve’l-istintâk ve’l-ikrâr alâ mûcîb-i ikrârihî meblağ-ı mezkûr iki yüz on buçuk guruş on yedi pâreyi müdde‘îyyân-ı mezbûrâna teslîme mesfûr Kabril zimmîye tenbîh olunduğu huzûr-ı âlîlerine i‘lâm olundu. Fî 3 Receb sene 1202.