İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 124 Hüküm no: 108 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cifit Yani’nin, İstanbul’a getirdiği koyunları zamanında kasaplara dağıtmayıp zarara sebep olduğu gerekçesiyle el-Hâc Ali Ağa hakkındaki davanın reddolunduğu Ma‘rûz Sâdır olan fermân-ı âlîlerine imtisâlen celeb tâ’ifesinden arzuhâl eden Cifit Yani nâm zimmî meclis-i şer‘-i kavîmde hâlâ Kasabbaşı Mehmed Emin Ağa ve ocak yazıcılarından Mehmed Efendi hâzırân oldukları hâlde kasab esnâfının kethüdâları el-Hâc Ali Ağa muvâcehesinde takrîr-i kelâm edip bundan akdem ben vesâ’ir celebân yedimizde olan ağnâmı işbu sene-i mübâreke Safer’i gurresinde tevzî‘ etmek üzre re’sini si‘rinden sekizer para noksân ile kasab esnâfına bey‘ etmişken kethüdâ-yı mezbûr sâ’ir celebânı takdîm ve şehr-i merkûm gurresinde celebânın mecmû‘ ağnâmını ve benim bin dört yüz ganemimi tevzî‘ ve mâ‘adâ ağnâmımı otuz beş gün mürûrunda tevzî‘ etmekle te’hîrinden nâşî yüz altmış re’s zâyi‘ ve mâ‘adâ ber-vech-i muharrer noksan verdikleri sekizer pâreden beş yüz altmış guruş ile zâyi‘ olan yüz altmış re’s ağnâmın ve tenezzül eden ma‘lûmü’l-mikdâr lühûmun kıymetlerini mezbûr el-Hâc Ali Ağa’dan tazmîn taleb ederim deyü tasaddî eylediği da‘vâ-yı meşrû‘a ve mu‘tebere olmamağla da‘vâ-yı mezkûresine iltifât olunmayıp bî-vech mu‘ârazadan ba‘de’l-men‘ müdde‘î-i mesfûr fîmâ ba‘d yine bu misillü tezvîrâta sülûk ve nizâm-ı mer‘îlerine muğâyir hareket eder ise te’dîb olunmak üzre müte‘ahhid ve râzı olduğu huzûr-ı âlîlerine i‘lâm olundu. Fî 18 C. sene 1202.