İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 126 Hüküm no: 110 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hüseyin b. Ömer’in iki adet kasap dükkanı gediği hisse ve aletlerini Ahmed b. Ebabekir’e sattığı Ma‘rûz Evkâf-ı hazret-i şehriyârîden Dokuzuncu Selhhâne’ye merbût olup İstanbul’da Kumkapı dâhilinde İncirdibi nâm mahalde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin rub‘ hisse-i şâyi‘asıyla Yedinci Selhhâne’ye merbût Aksaray’da Acıçeşme kurbünde vâki‘ bir bâb kasab dükkânı derûnunda mevcûde kezâlik gedik âlâtının nısf-ı şâyi‘ına bâ-temessük-ı mütevellî mutasarrıf olan el-Hâc Hüseyin b. Ömer tarafından husûs-ı âtîde vekîl olduğu Mehmed b. Feyzullah ve İsmail b. Mehmed şehâdetleriyle sâbit olan el-Hâc Osman b. el-Hâc Ali meclis-i şer‘-i kavîmde hâlâ Kasabbaşı Mehmed Emin Ağa tarafında vekîli el-Hâc Ali Ağa ve Mehmed Usta hâzırân oldukları hâlde yine kasab ustalarından Ahmed b. Ebabekir muvâcehesinde bi’l-vekâle takrîr-i kelâm edip müvekkilim mezbûr el-Hâc Hüseyin ber-vech-i muharrer mârrü’z-zikr iki bâb dükkân derûnlarında gedik âlâtından mutasarrıf olduğu hisse-i mezkûresini hüsn-ı rızâ ve ihtiyârıyla bâ-ma‘rifet-i mütevellî bedel-i ma‘lûme mukâbelesinde mezbûr Ahmed’e ferâgat ve kasr-ı yed eyledikde ol dahî kabûl ve tefevvüz edip fîmâ ba‘d âlât-ı mezkûre hisselerinden müvekkil-i mezbûrun alâkası kalmayıp mezbûr Ahmed’in hakk-ı mufavvazı olmuşdur dedikde ol dahî ba‘de’t-tasdîk sâlifü’l-beyân İncirdibi’nde olan dükkânın gedik âlâtından rub‘ hisse ve Acıçeşme kurbünde olan dükkânın gedik âlâtından dahi nısf hisse müvekkil-i mezbûr el-Hâc Hüseyin ferâgından merkûm Ahmed üzerine tahrîr ve defter-i vakfa kayd birle yedine temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu. Fi 8 min Receb sene 1202.