İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 127 Hüküm no: 111 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenaki v. Panayot’un iki adet kasap dükkanı gedik hisse ve aletlerini Hasan Ağa b. Ali’ye sattığı Ma‘rûz Evkâf-ı hazret-i şehriyârîden Dördüncü Selhhâne’ye merbût olup İstanbul’da Alipaşa-yı Atîk Hamâmı civârında kâ’in birbirine muttasıl iki bâb kasab dükkânları derûnlarında mevcûde beyne’l-hıref gedik ta‘bir olunur âlât-ı lâzıme-i ma‘lûmelerinin nısf-ı şâyi‘lerine bâ-temessük-ı mütevellî mutasarrıf olan Yenaki v. Panayot nâm zimmi meclis-i şer‘-i enverde hâlâ Kasabbaşı Mehmed Emin Ağa [28b] tarafından vekîli kassâbân kethüdâsı el-Hâc Ali Ağa ve ustalarından el-Hâc Osman Ağa hâzırân olduları hâlde yine kasab ustalarından Hasan Ağa b. Ali muvâcehesinde ber-vech-i muharrer iki bâb dükkânların gedik âlâtlarından mutasarrıf olduğum nısf hisse-i şâyi‘amı hüsn-ı rızâ ve ihtiyârımla bâ-ma‘rifet-i mütevellî bedel-i ma‘lûm mukâbelesinde mezbûr Hasan Ağa’ya ferâgat ve kasr-ı yed eyledikde ol dahî tefevvüz ve kabûl edip fîmâ ba‘d âlât-ı mezkûrenin nısflarında benim kat‘â alâka ve medhalim kalmayıp mezbûr Hasan Ağa’nın hakk-ı mufavvazı olmuşdur dedikde ol dahî ba‘de’t-tasdîk mârrü’z-zikr iki bâb dükkân gediklerinin nısfları mersûm Yenaki zimmî ferâgından mezbûr Hasan Ağa üzerine tahrîr ve defter-i vakfa kayd birle yedine temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî 8 min Receb sene 1202.