İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 127 Hüküm no: 112 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İsmail’in kasap dükkanı gedik hisse ve aletlerini Ebubekir Usta’ya sattığı Evkâf-ı hazret-i şehriyârîden Yedinci Selhâne’ye merbût olup İstanbul’da Hekimzâde Ali Paşa Câmi-i Şerîfi kurbünde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin rub‘una bâ-temessük-ı mütevellî mutasarrıf olan Mehmed b. İsmail tarafından ferâğ-ı âti’l-beyânı ikrâra vekîl olduğu kassâbân kethüdâsı el-Hâc Ali Ağa ve Mehmed b. Hasan şehâdetleriyle sâbit olan Mehmed b. Feyzullah meclis-i şer‘-i kavîmde hâlâ Kasabbaşı Mehmed Emin Ağa tarafından vekîli kethüdâ-yı mezbûr Ali Ağa ile ustalarından el-Hâc Osman hâzır oldukları hâlde yine kasab ustalarından âlât-ı mezkûrenin nısfına mutasarrıf olan Ebubekir b. Osman tarafından tasdîka vekîli İsmail b. Mehmed muvâcehesinde bi’l-vekâle takrîr-i kelâm edip müvekkilim mezbûr Mehmed ber-vech-i muharrer mutasarrıf olduğu rub‘ hisse-i mezkûresini hüsn-ı rızâ ve ihtiyârıyla bâ-ma‘rifet-i mütevellî bedel-i ma‘lûm mukâbelesinde âlât-ı mezkûrenin nısfına mutasarrıf olan mezbûr Ebubekir Usta’ya ferâgat ve kasr-ı yed edip ol dahî tefevvüz ve kabûl etmeğin fîmâ ba‘d rub‘ âlât-ı mezkûrede müvekkil-i mezbûrun kat‘â alâka ve medhali kalmayıp mezbûr Ebubekir Usta’nın hakk-ı mufavvazı olmuşdur dedikde mezbûr İsmail dahi ba‘de’t-tasdîk rub‘ âlât-ı mezkûr dahî müvekkil-i mezbûr Ebubekir Usta üzerine tahrîr ve defter-i vakfa kayd birle temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu el-emru li-men lehü’l-emr. Fî 8 min Receb sene 1202.