İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 128 Hüküm no: 113 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hasan’ın kasap dükkanı gedik hisse ve aletlerini İsmail b. Mehmed’e sattığı Ma‘rûz Evkâf-ı hazret-i şehriyârîden Yedinci Selhhâne’ye merbût olup Ayasofya-i Kebîr Câmi-i Şerîfi kurbünde nalband dükkânı kurbünde vâki‘ bir bâb kasab dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin iki kıt‘a temessük ile mutasarrıfı Mehmed b. Hasan nâm kimesne meclis-i şer‘-i kavîmde hâlâ Kasabbaşı Mehmed Emin Ağa tarafından vekîli Kasablar Kethüdâsı el-Hâc Ali Ağa ve ustalarından el-Hâc Osman hâzırân oldukları hâlde yine kasab ustalarından İsmail b. Mehmed muvâcehesinde takrîr-i kelâm edip ber-vech-i muharrer mutasarrıf olduğum âlât-ı lâzıme-i ma‘lûmemi hüsn-ı rızâ ve ihtiyârımla bâ-re’y-i mütevellî bedel-i ma‘lûm mukâbelesinde mezbûr İsmail’e ferâgat ve kasr-ı yed eylediğimde ol dahî tefevvüz ve kabûl edip fîmâ ba‘d âlât-ı mezkûrede benim kat‘â alâka ve medhalim kalmayıp mezbûr İsmail’in hakk-ı mufavvazı olmuşdur dedikde mezbûr İsmail dahî ba‘de’t-tasdîk âlât-ı mezkûre mezbûr Mehmed’in ferâğından merkûm İsmail üzerine tahrîr ve defter-i vakfa kayd birle yedine temessük i‘tâ olunmak niyâzında oldukları İstanbul Mahkemesi’nden huzûr-ı âlîlerine i‘lâm olundu. Fî 8 min Receb sene 1202.