İstanbul Mahkemesi 56 Numaralı Sicil (H. 1201-1203 / M. 1786-1787) cilt: 80, sayfa: 129 Hüküm no: 114 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Âişe Hânım’ın yaptırdığı mektebin es-Seyyid el-Hâc Hüseyin b. Mehmed’in evine verdiği zarar dolayısıyla açtığı davanın reddolunduğu Ma‘rûz Sâdır olan fermân-ı âlîlerine imtisâlen savb-ı şer‘-i enverden mürsel Ahmed Efendi ve nezâret-i hazret-i şeyhülislâm-ı sellemehü’s-selâmîde âsûde evkâf müfettişi [29b] müderrisîn-i kirâmdan fazîletlü İsmail Salih Efendi tarafından mürsel müdderisîn-i kirâmdan Abdülkadir Efendi ve hâssa mi‘mârı hülefâsından İsmail Hafız Mehmed Emin Halîfeler ile İstanbul’da Çatalçeşme kurbünde vâki‘ Muhyiddin el-Fenârî Câmî-i Şerîfi’ne varıp huzûr-ı Müslimînde ba‘de akdi’l-meclis câmi‘-i mezkûr ittisâlinde kâ’in merhûm Uzun Şücâeddin Vakfı müsakkafâtından bir bâb menzile mutasarrıf olan sâhib-i arzuhâl es-Seyyid el-Hâc Hüseyin b. Mehmed nâm kimesne meclis-i ma‘kûd-ı mezkûrda mârrü’z-zikr Uzun Şücâeddin Vakfı mütevellîsi Ahmed Efendi tarafından mürsel kâtib-i vakf es-Seyyid Mehmed Efendi hâzır olduğu hâlde merhûm mûmâileyh Muhyiddin el-Fenârî Vakfı’nın ber vech-i meşrûta mütevelliyesi ve zâtı ta‘rîf-i şer‘î ile mu‘arrefe olan Şerîfe Âişe Hânım bt. es-Seyyid Mehmed mahzarında işbu akd-i meclis olunan câmi‘-i mezkûr havlısında kat‘â binâ yoğiken mütevelliye-i mezbûre câmi‘-i mezkûra fevkânî mahfil ve mekteb olmak üzere tûlen on iki ve arzen altı buçuk ve kadden sekiz zirâ‘ binâ ihdâs etmekle benim menzilimin vüstâda olan odasının bir aded Fârsî penceresinin ziyâsını kat‘ ve oda-i mezkûre ziyâde karanlık olup zarar-ı bînî olmağla zararını def‘a mütevelliye-i mezbûreye tenbîh olunmak matlûbumdur dedikde mütevelliye-i mezbûre dahi cevâbında mahâll-i mezkûrda kadîmden mahfil ve tarîk-i âm cânibine şehnişinli mekteb binâ olunmuş iken câmi‘-i şerîf-i mezkûr bin yüz seksen iki senesi bi-kazâi’llâh-i te‘âlâ vukû‘ bulan harîkde muhterik oldukda cümlesini binâya cânib-i vakfda müsâ‘ade olmadığına binâ’en ancak câmi‘-i şerif binâ olunup hâlâ mahâll-i mezkûru binâya cânib-i vakfdan müsâ‘ade olmağla kadîmi üzere binâ edip lâkin mezbûr es-Seyyid Hüseyin menzilinin Fârisî penceresinin üzerinde olan saçağını bi-gayr-ı hakkin mekteb-i mezkûr üzerine tûlen bir zirâ‘ ve menzili sakfının hürmet saçağı mahallini dahî arzen sekiz parmak uzatıp zarar-ı bînî olmağla ber-vech-i muharrer zararını def‘a mezbûr es-Seyyid el-Hâc Hüseyin’e tenbîh olunmak matlûbumdur deyip fi’l-hakîka kable’l-harîk mahall-i mezkûrda mahfil ve tarîk-i âm cânibine şehinşinli mekteb olduğunu mahalle-i mezbûre ahâlîsinden Süleyman Ağa b. Abdullah ve Hasan Ağa b. Mustafa sâbıkan bostancılar odabaşısı Mustafa Ağa b. İsmail ve Mehmed Ağa b. Abdullah, İmâm es-Seyyid el-Hâc Mustafa Efendi b. es-Seyyid el-Hâc Osman nâm kimesneler ba‘de’l-ihbâr mi‘mârân-ı mezbûrân Müslimûn-ı hâzırûn ile keşf ve mu‘âyene eylediklerinde müdde‘î-i mezbûr es-Seyyid el-Hâc Hüseyin’in vüstâda olan odasının ziyâsı kat‘ olunmayıp zarar-ı bînî olmadığını ve ulyâda olan odasının penceresi üzerinde olan saçağı tûlen bir zirâ‘ ve sakfının hürmet saçağı mahalli arzen sekiz parmak mekteb-i mezkûr üzerine uzayıp zarar-ı bînî olduğunu haber vermeleriyle mezbûr es-Seyyid el-Hâc Hüseyin dâ‘vâ-yı mezkûresiyle mütevelliye-i mezbûreye bî-vech-i şer‘î mu‘ârazadan ba‘de’l-men‘ mârrü’z-zikr pencere üzerinde olan tûlen bir zirâ‘ saçak ile sakfının hürmet saçağından ziyâdesini kat‘a mezbûr es-Seyyid el-Hâc Hüseyin’e mahallinde tenbîh eylediklerini mevlânâ-yı mezbûrân meclis-i şer‘a ba‘de’l-inhâ huzûr-ı âlîlerine i‘lâm olundu el-emrün li-veliyyi’l-emr. Fî gurre-i Recebi’l-ferd sene 1202.